काठमाडौं । काठमाडौं उपत्यकामा उच्च वायु प्रदूषण भएको छ । काठमाडौंको वायु निकै अस्वस्थकर तहमा पुगेको हो । काठमाडौं प्रदूषित शहरको सूचीमा बुधबार बिहान विश्वमै दोस्रो नम्बरमा छ । काठमाडौंभन्दा धेरै प्रदूषित हावा भारतको नयाँदिल्लीमा रहेको छ ।

आइक्यूएयरको तथ्यांक अनुसार आज बिहान काठमाडौंको औसत एअर क्वालिटी इन्डेक्स (एक्यूआई) २६८ माइक्रो ग्राम प्रति घनमिटर मापन गरिएको छ । पहिलो स्थानमा रहेका दिल्लीमा बिहान ३९५ प्रति घण्टा २६१ माइक्रो ग्राम प्रति घनमिटर मापन गरिएको छ । प्रदूषणले काठमाडौंको आकाश तुवाँलोले ढाकेको छ । तुवाँलोका कारण काठमाडौंमा मधुरो घाम देखिएको छ । ​

वायु प्रदूषणको मापदण्ड अनुसार १०१ देखि १५० लाई नै संवेदशनशील समूहका लागि अस्वस्थ मानिन्छ । १५१ देखि २०० सम्मलाई अस्वस्थ, २०१ देखि ३०० सम्मलाई निकै अस्वस्थ र ३०१ भन्दा माथि मापन भए खतरनाक तह पुगेको मानिन्छ । काठमाडौंको वातावरण स्वास्थ्यको लागि एकदमै हानिकारक रहेकाले सचेतना अपनाउन विज्ञहरूले सुझाव दिएका छन् ।