महाकुम्भकी भाइरल गर्ललाई बलात्कार गरेको आरोपमा निर्देशक सरोज मिश्रा पक्राउ
काठमाडौं । प्रयागराजमा आयोजित महाकुम्भ मेलामा भाइरल भएकी ‘मोनालिसा’ लाई फिल्ममा काम गर्ने अफर दिएका निर्देशक सनोज मिश्रा पक्राउ परेका छन्। सेन्ट्रल दिल्ली प्रहरीको नबी करिम थानाको टोलीले निर्देशक सनोज मिश्रालाई गाजियाबादबाट पक्राउ गरेको हो। उनलाई बलात्कार, कुटपिट, गर्भपतन गराउने तथा धम्की दिने आरोप लागेको छ।
आरोप अनुसार सानो शहरबाट आएकी एक युवतीलाई मिश्राले बलात्कार मात्र गरेनन्, तर तीन पटक गर्भपतन गराउन समेत बाध्य पारेको भारतीय सञ्चारमाध्यमले बताएका छन् । २८ वर्षीय युवतीको उजुरीको आधारमा बलात्कार, कुटपिट, गर्भपतन गराउने, धम्की दिने लगायतका धारामा नबी करिम प्रहरी कार्यालयमा एफआईआर दर्ता गरिएको थियो।
पीडितको उजुरी अनुसार, आरोपी चार वर्षदेखि मुम्बईमा लिभ-इन सम्बन्धमा बसिरहेका थिए। उनले आफूलाई तीन पटक गर्भपतन गराउन बाध्य पारिएको बताएकी छन्।
एफआईआरमा उल्लेख भएअनुसार, १८ फेब्रुअरी २०२५ मा आरोपीले उनलाई नबी करिमस्थित होटल शिवामा ल्याई जबरजस्ती सम्बन्ध राखेका थिए। पछि मिश्राले विवाह गर्ने आश्वासन दिएर धोका दिएको पीडितको भनाइ छ। उनले सीआरपीसीको धारा १६४ अन्तर्गत बयान दिँदै आफ्नो आरोप दोहोर्याएकी थिइन्।
अनुसन्धानका क्रममा मुजफ्फरनगरबाट गर्भपतन सम्बन्धी मेडिकल कागजात संकलन गरिएको छ। दिल्ली उच्च अदालतले पनि आरोपीको जमानत निवेदन खारेज गरिसकेको छ। त्यसपछि, ४५ वर्षीय आरोपी सनोज मिश्रालाई प्रहरीले गाजियाबादबाट पक्राउ गरेको हो। मिश्रा विवाहित रहेका र परिवारसहित मुम्बईमा बस्ने गरेका बताइएको छ ।
आरोप अनुसार, उनले झुक्याएर पीडितलाई रिसोर्टमा लगेर नशालु पदार्थ खुवाई जबर्जस्ती करणी गरेका थिए। एफआईआरमा उल्लेख भएअनुसार, आरोपीले पीडितको आपत्तिजनक फोटो तथा भिडियो खिची धम्की दिएका थिए । पीडितले विरोध गरेमा ती भिडियोहरू सामाजिक सञ्जालमा सार्वजनिक गरिदिने उनले धम्की दिएका पीडितको बयान उद्धृत गर्दै भारतीय प्रहरीले जनाएको छ। साथै, उनले विवाहको आश्वासन दिँदै विभिन्न स्थानमा बोलाई पटक–पटक जबर्जस्ती सम्बन्ध राखेको तथा फिल्ममा काम दिलाउने प्रलोभन देखाएको आरोप छ।
