राजावादीको आन्दोलन : जसले घटाएको हो उसैबाट क्षतिपूर्ति भराउनुपर्छ – समाजवादी मोर्चा
काठमाडौं । समाजवादी मोर्चाले गत शुक्रबार तीनकुने क्षेत्रमा भएको राजावादीको आन्दोलनका क्रममा भएको क्षतिको असुल सोही समूहबाटै असुल गराउनुपर्ने निर्णय गरेको छ ।
आज बिहान बसेको समाजवादी मोर्चाको बैठकले चैत १५ गतेको घटना नियोजित भएको र यसको सम्पूर्ण क्षतिपूर्ति पूर्वराजा शाहले बेहोर्नुपर्ने निष्कर्ष निकालेको नेकपाका प्रवक्ता खड्गबहादुर विश्वकर्माले जानकारी दिएका छन् । बैठकले क्रान्तिबाट स्थापित भएको गणतन्त्रको रक्षाका लागि गणतन्त्र पक्षधरबिच बृहत् अन्तर्क्रिया गर्ने समेत निर्णय गरेको छ ।
तीनकुने क्षेत्रमा भएको हिंसात्मक प्रदर्शनका क्रममा दुई जनाको ज्यान गएको थियो । भने आन्दोलनकारीहरूले तीनकुनमा रहेको दुईवटा निजी घर, सञ्चारगृह, कोटेश्वरमा रहेको जडिबुटी कारखाना, दुई दर्जन बढि नीजि तथा सरकारी सवारी साधन, सडकमा रहेका संरचनामा तोडफोड र आगजनी गरेका थिए ।
सोहि प्रदर्शनका क्रममा एकीकृत समाजवादीको पार्टी कार्यालयमा पनि आगजनी गरेका थिए । कोटेश्वरको भाटभटेनी सुपरमार्केटमा उनीहरूले लुटपाटसमेत भएको थियो ।
