काठमाडौं ।  सरकारले  इस्लाम धर्मावलम्बीहरूको आज इदउलफित्रको अवसरमा सार्वजनिक बिदा दिने निर्णय गरेको छ । गृह मन्त्रालयका सचिव गोकर्णमणि दुवाडीले आइतबार साँझको चन्द्रमा देखिएपछि आज सोमबार सरकारले सार्वजनिक बिदा दिने निर्णय गरेको जानकारी दिए ।

इस्लाम धर्मावलम्बीहरूको एक महिनासम्म चलेको महान पर्व ‘रमजान मुबारक’ हिजो समाप्त भएको छ ।  एक महिनासम्म सञ्चालन भएको रमजान मुबारकमा इस्लाम धर्मावलम्बीहरूले दिनभर निराहार व्रत बस्छन् ।

रोजा बस्न मुसलमानहरूले उर्दू पात्रोअनुसार सूर्योदय हुनुभन्दा पहिले अर्थात् बिहानको नमाज पढ्नुअगावै खानेकुरा खाई प्रारम्भ हुने र बेलुकाको नमाज (मगरिब) को आजान सुनेर खोल्ने चलन छ । निराहार बस्नुलाई रोजा भनिन्छ ।