काठमाडौं । सरकारद्वारा जहाँ भए पनि जुनसकै अवस्थामा देखे पनि पक्राउ गर्न आदेश जारी गरिएका राजजावादी आन्दोलनका कमान्डर दुर्गा प्रसाईँले सरकारलाई २४ घन्टाभित्र आफू र पूर्वराजा ज्ञानेन्द्रलाई थुनेर देखाउन चुनौती दिएका छन् ।

प्रसाईँले सामाजिक सञ्जालमार्फत आज आइतबार भिडियो वक्तव्य जारी गर्दै सरकारले राजावादी आन्दोलन दबाउन खोजेको आरोप लगाए। उनले भने, ‘सरकारको हिम्मत छ भने २४ घन्टाभित्र मलाई र राजालाई गिरफ्तार गरेर देखाओस्।’ सरकारले आन्दोलनलाई उग्र बनाउन प्रसाईँको संलग्नता रहेको दाबी गर्दै उनीविरुद्ध कानूनी प्रक्रिया अघि बढाएको छ। यसैक्रममा सुरक्षा निकायले उनको खोजी तीव्र बनाएको छ।

प्रसाईंले भिडियो सन्देशमा आफू नभागेको तर आफ्नो ज्यान जोगाउन काठमाडौंकै कुनै एक मन्दिरमा सुरक्षित भएर बसेको बताएका छन् । ‘म सुरक्षाकर्मीहरूलाई भन्न चाहन्छु, म तपाईंहरूभन्दा टाढा छैन । म भागेको छैन । पुलिस प्रशासनले मलाई खोज्न पर्दैन । मलाई भेटेको ठाउँमा गोली हान्ने आदेश भएकाले म सुरक्षित मात्र भएर बसेको हुँ । म भाग्नलाई जन्मेको होइन ।’

उनले भने, ‘प्रहरीलाई जति माया छ, म जतिको कोही छैन । तपाईंलाई दुर्गा प्रसाईंले पेल्यो भन्ने लाग्यो होला । तर, मलाई लक्षित गरेर छतमा सार्प सुटरहरू राखिएको थियो । तीनकुने पुग्दा मेरो कानको छेवैबाट गोलीहरू गयो । त्यसपछि कसको रगत उम्लिँदैन । मैले पुलिस चित्त दुखाउने काम गरेको छैन । आफूलाई सुरक्षित राख्न मात्र घेरा तोडेको हुँ ।’

उनले भने, ‘लघुवित्त पीडित, सहकारी पीडित, बैंक पीडित, विदेश जाने पीडितलगायतको आवाजलाई उठाएर अघि बढाएपछि अब हामीले लडाइँ जित्छौँ, विद्रोह सफल हुन्छ भनेपछि विभिन्न भेषभूषामा युवा संघ र पुलिस प्रशासनका केही व्यक्ति सिभिल ड्रेसमा अर्काको घरमा चढेर घटना घटाइयो ।’