काठमाडौं । नेपाली कांग्रेसका पूर्वउपसभापति विमलेन्द्र निधिको निवास नयाँ बानेश्वरमा जना नेताको अनौपचारिक भेटघाट भएको छ । हिजो शनिबार बिहान बसेको दुई घण्टा लामो बैठकमा गोपालमान श्रेष्ठ, प्रकाशमान सिंह, विमलेन्द्र निधि, विजय गच्छदार, कृष्णप्रसाद सिटौला र डा. शशांक कोइराला सहभागी थिए ।

नेताहरूबिचको अनौपचारिक भेटघाटमा हिजो राजधानीमा भएको प्रतिगमनकारी एवम् आपराधिक घटनाको भर्त्सना गर्दै जनताको जीउधनको सुरक्षामा कडाई गर्न सरकारको ध्यानाकर्षण गराइएको छ । घटनामा समाचार सङ्कलनका क्रममा एभिन्यूज टेलिभिजनका पत्रकार सुरेश रजक र कीर्तिपुरका सबिन महर्जनको निधनप्रति दुःख व्यक्त गर्दै घाइतेहरूको शीध्र स्वास्थ्यलाभको कामना गरिएको छ ।

यसैगरी, हिजो तीनकुनेमा भएको प्रदर्शनको घटनाको छानबिन गरी घटनामा संलग्न दोषीमाथि तत्काल कारबाहीको मागसमेत गरिएको छ । एकीकृत समाजवादीको पार्टी कार्यालयमा भएको तोडफोडको भत्र्सना गरिएको छ । साथै, कान्तिपुर टेलिभिजन, अन्नपूर्ण पोष्ट दैनिक, अनलाइनखबरमा भएको आक्रमण, जडिबुटी प्रशोधन तथा भाटभटेनी लगायतका व्यापारिक गृहमा भएको तोडफोड र लुटपाटको घटनाको भत्र्सना गरिएको छ ।

छलफल पछिल्लो राजनीतिक घटनाक्रम, समसामयिक राजनीति र कांग्रेसको १५ औं महाधिवेशनमा समेत केन्द्रित रहेको थियो । छलफलमा सङ्घीय लोकतान्त्रिक गणतन्त्रात्मक शासन प्रणालीको पक्षमा जनमतलाई सुदृढ पार्ने र नेपाली कांग्रेसको सङ्गठनात्मक सुदृढीकरणका लागि पार्टीलाई एकताबद्ध गराएर सङ्गठन परिचालन गर्नु आजको प्रमुख आवश्यकता भएको बारे छलफल भएको थियो । भेटघाटमा अरू शीर्ष नेताहरूलाई समावेश गर्दै यस्तो किसिमको भेटघाट आगामी दिनमा जारी राख्ने समझदारी भएको छ । बैठकमा सहभागी एक नेताका अनुसार पार्टी सभापति शेरबहादुर देउवाको ओली परस्त नीतिमाथि असन्ताष प्रकट गरिएको थियो ।