काठमाडौं । राष्ट्रिय प्रजातन्त्र पार्टी (राप्रपा नेपाल) का अध्यक्ष कमल थापाले काठमाडौं महानगरपालिकाका मेयर बालेन साहले तीनकुने घटनालाई लिएर पूर्वराजा ज्ञानेन्द्र साहलाई जरिवाना तिराउने पत्र काट्नु हास्यास्पद भएको बताएका छन् । अध्यक्ष थापाले सामाजिक सञ्जालमा बालेनको उक्त निर्णय फिर्ता लिनु बुद्धिमानी हुने पनि बताए ।

अध्यक्ष थापाको सामाजिक सञ्जालको बक्तव्य यस्तो रहेको छ, “तिनकुनेमा चैत १५ गते भएको कार्यक्रमलाई लिएर राजा ज्ञानेन्द्रलाई जरिवाना गर्ने काठमाडौं महानगरपालिकाको निर्णय हास्यास्पद छ। गलत ठेगानामा पठाईएको पत्रजस्तो स्टण्ट भयो। मेयर बालेन साहबाट यस्तो त्रुटि कसरी भयो होला ?, म अलमलमा छु। संयुक्त जनआन्दोलन समिति र नागरिक बचाउ अभियानले जिल्ला प्रशासनसँग स्विकृति लिएर कार्यक्रम गरेको रेकर्ड हेर्न महानगरपालिकालाई आग्रह छ। पत्रको भाषा पनि अशिष्ट र अमर्यादित छ । राजाको कुरा छोडिदिउँ, उहाँ पूर्वराष्ट्राध्यक्ष पनि हुन्छ भन्ने महानगरपालिकाले हेक्का राख्नु पर्ने थियो। पत्र फिर्ता लिनु बुद्धिमानी हुनेछ।