काठमाडौं । संयुक्त जनआन्दोलन समितिले काठमाडौंको तीनकुनेमा भएको आन्दोलन घोषणा सभामा प्रहरीको हस्तक्षेपबाट सभा बिथोलिएको,आन्दोलनका सहभागीमाथि गोली प्रहार, अश्रुग्यास प्रहार गरी दमन गरिएको आरोप लगाएको छ।
संयोजक नवराज सुवेदीद्वारा आज शनिबार जारी विज्ञप्तिमा समितिले घटनामा मृत्यु भएका नागरिकप्रति श्रद्धाञ्जली व्यक्त गर्दै हिंसात्मक घटनाको घोर भर्त्सना गरेको छ।

विज्ञप्तिमा जन कमाण्डर दुर्गा प्रसाईंमाथि पक्राउ पूर्जी जारी गरिएको, राप्रपाका उपाध्यक्ष रविन्द्र मिश्र, धवलशम्शेर राणा, प्रवक्ता स्वागत नेपाललगायत नेताहरूलाई पक्राउ गरिएको र आफूलाई समेत नजरबन्दमा राखिएको उल्लेख गरिएको छ। साथै, पूर्वराजालाई बदनाम गराउने उद्देश्यसहित नजरबन्द वा पक्राउको तयारी भइरहेको दाबी गरिएको छ।

संयुक्त जन आन्दोलन समितिले जनचाहना र जनविद्रोहबाट उत्पन्न आन्दोलन कुनै पनि नेताको इसारामा नचलेको स्पष्ट पार्दै, सरकारको दमनको विरोधमा देशभर शान्तिपूर्ण आन्दोलन गर्ने चेतावनी दिएको छ। देशभक्त नागरिकको स्वतःस्फूर्त सहभागिता रहनुपर्ने उल्लेख गर्दै विज्ञप्तिमा ‘विषम परिस्थितिमा कसैले व्यक्तिगत स्वार्थका लागि फाइदा उठाउने प्रयास नगरोस्’ भन्ने आग्रह गरिएको छ।