एलन मस्कले सामाजिक सञ्जाल एक्स (ट्वीटर) बेचे
काठमाडौं । एलन मस्कले आफ्नै कम्पनीलाई सामाजिक सञ्जाल प्लेटफर्म ‘एक्स’ बेचेका छन् । मस्कले आफ्नो स्वामित्वमा रहेको सामाजिक सञ्जाल एक्स (ट्वीटर) आफ्नै एआई कम्पनी एक्सएआईलाई बेचेका हुन् । ३३ अर्ब डलरमा एक्स एआई कम्पनी एक्सएआईलाई बेचेको मस्कले बताएका छन् ।
मस्कले अल स्टक विनिमय सम्झौताका आधारमा एक्सएआईको ८० अर्ब डलर र एक्सको ३३ अर्ब डलर मूल्यांकन गरिएको बताएका छन् । मस्कले सन् २०२२ मा ट्वीटरलाई ४४ अर्ब डलरमा खरिद गरेका थिए ।
‘एक्सएआई र एक्सको भविष्य आपसमा गाँसिएको छ,’ मस्कले भनेका छन्, ‘हामीले डेटा, मोडेल, कम्प्युटिङ, वितरण र प्रतिभालाई एकसाथ ल्याउने निर्णय गरेका छौँ ।’ विश्लेषकहरूका अनुसार, मस्कको यो कदम उनका लगानीकर्तालाई सुरक्षित गर्न र एआई प्रविधिमा अझ सशक्त लगानी गर्न लक्षित हुन सक्छ ।
एक्सआईले पहिले नै एक्समा भएका सामाजिक सञ्जाल पोस्टबाट आफ्नो एआई मोडेललाई तालिम दिँदै आएको छ । साथै, एक्सआईको च्याटबोट ‘ग्रोक’ अहिले एक्स प्लेटफर्ममा महत्त्वपूर्ण रूपमा प्रयोग भइरहेको छ ।
