काठमाडौं । राजावादी समूहले आफ्नो आन्दोलनमा भएका हिंसात्मक कार्यमा सरकारी घुसपैठ भएको आरोप लगाएको छ । राजसंस्था पुनर्स्थापनाका लागि गठित संयुक्त जनआन्दोलन परिचालन समितिका प्रवक्ता स्वागत नेपालले आज शुक्रबार साँझ एक विज्ञप्ति जारी गर्दै ‘आन्दोलनमा सरकारी पक्षले शान्तिपूर्ण आन्दोलनमा बाधा पुर्‍याइएको र घुसपैठ गरेको’ आरोप लगाए ।

‘राजसंस्था पुनर्स्थापनाका लागि सुरु भएको शान्तिपूर्ण जनआन्दोलनमा भ्रष्ट, निरङ्कुश र प्रतिगामी सत्ताधारीहरूद्वारा घुसपैठ गराई अशान्त वातावरण सिर्जना गराइएकोमा संयुक्त जनआन्दोलन परिचालन समिति निन्दा व्यक्त गर्दछ,’ विज्ञप्तिमा भनिएको छ । भृकुटीमण्डपमा आयोजित समाजवादी मोर्चाको भन्दा धेरै सङ्ख्यामा जनताको उपस्थिति भएपछि सरकारी पक्ष आत्तिएको आरोप राजावादी समूहको छ । बालाजु, कलंकी, बूढानीलकण्ठ र चाबहिललगायतका क्षेत्रहरूमा नागरिकको आवागमनमा प्रतिबन्ध लगाएको आरोप विज्ञप्तिमा लगाइएको छ ।

समितिले आन्दोलन सरकारले तोकेको क्षेत्रमा मात्र सीमित नहुनेसमेत चेतावनी दिएको छ । विज्ञप्तिमा घाइते आन्दोलनकारी र प्रहरीहरूको निःशुल्क उपचार गर्न, व्यवसायीलाई क्षतिपूर्ति दिन र सर्वपक्षीय वार्ता र संवाद गर्न माग गरिएको छ ।