(पत्रकार सुरेश रजक)

काठमाडौं । राजावादी समर्थकहरूको प्रदर्शनले हिंसात्मक रूप लिएपछि एक पत्रकारसहित दुईजनाको मृत्यु भएको छ । तीनकुनेको प्रदर्शन स्थलमा भेटिएको शव पत्रकार सुरेश रजकको पुष्टि भएको छ । शुक्रवार दिउँसो आगजनी भएको घरसँगै उनको शव भेटिएको थियो । शव पत्रकार रजकको पुष्टि भएको उपत्यका प्रहरी कार्यालयले पुष्टि गरेको छ ।

रजक एभिन्युज टेलिभिजनमा कार्यरत थिए । रजक प्रदर्शनको दृश्य खिच्न तीनकुनेमा गएका हुन् । यसअघि प्रदर्शनमा एकजनाको मृत्यु भएको गृह मन्त्रालयले पुष्टि गरेको छ । कीर्तिपुर नगरपालिका–४ बस्ने सविन महर्जनको मृत्यु भएको गृह मन्त्रालयका सहसचिव छवि रिजालले जानकारी दिए ।

सरकारले दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ र नवराज सुवेदी नेतृत्वको ‘राजसंस्था पुनर्स्थापनाका लागि संयुक्त जनआन्दोलन समिति’लाई तीनकुनेमा प्रदर्शन गर्न अनुमति प्रदान गरेको थियो ।