भक्तपुर । नेपाल पत्रकार महासंघ जिल्ला शाखा भक्तपुरले डिजिटल पत्रकारिता र एआई विषयक एकदिने अभिमुखीकरण सम्पन्न गरेको छ ।

मध्यपुर थिमी नगरपालिकाको सह–कार्यमा भएको उक्त कार्यक्रमको उद्घाटन गर्दै नगर प्रमुख सुरेन्द्र श्रेष्ठले मध्यपुुर थिमी नगरपालिका शिक्षा स्वास्थ्य, सांस्कृतिक सम्पदा संरक्षणका साथै भक्तपुरको पत्रकारिता विकासमा पनि काम गर्दै आइरहेको बताए । नगरपालिकाले केही समयअगाडि मात्र मध्यपुर महोत्सव सम्पन्न गर्दै आन्तरिक तथा वाह्य पर्यटन आर्कषण गरेको भन्दै भक्तपुरका पत्रकारले महोत्सव सफल बनाउन सहयोग गरेको बताए ।

अहिलेको युग डिजिटलको युग भएकाले भक्तपुरका क्रियाशील सञ्चारकर्मीहरूको क्षमता अभिवृद्धि गर्न नगरपालिकाले महासंघ भक्तपुर शाखासँग सह–कार्य गरेको नगर प्रमुख श्रेष्ठले बताए । उनले अहिले लोकतन्त्रमाथि नै प्रहार भइरहेको भन्दै लोकतन्त्रको रक्षा गर्न सबै राजनीतिक दलहरू एक ठाँउमा आउनुपर्ने बताए । श्रेष्ठले सञ्चारकर्मीहरूले लोकतन्त्र बचाउन कलम चलाउनुपर्ने समेत बताए ।

कार्यक्रममा नेपाल पत्रकार महासंघका केन्द्रीय महासचिव रामप्रसाद दाहालले डिजिटल पत्रकारिताको युुगमा एआईभन्दा पनि पत्रकार छरिटो (एडभान्स) हुनुपर्ने बताए । नेपालको पत्रकारिता खस्किएको जस्तो देखिएकोले एआई प्रविधि र डिजिटल प्रविधिसँगै पत्रकारितालाई अगाडि बढाउनुपर्ने बताए ।

उनले तीन तहका सरकारले पत्रकारको क्षमता अभिवृद्धिमा सहयोग गर्नुपर्ने बताए । कार्यक्रममा नेपाल पत्रकार महासंघ भक्तपुर शाखाका अध्यक्ष सुन्दर शिल्पकारले भक्तपुरको सञ्चार क्षेत्रमा नयाँ आयामा थप्न डिजिटल पत्रकारिता र एआई प्रविधिको क्षमता अभिवृद्धि कार्यक्रम आयोजना गरेको बताए ।

उनले डिजिटल पत्रकारिताको क्षेत्रमा एउटा इँट थपिएको समेत बताए । आगामी दिनमा पनि भक्तपुर क्षेत्रको पत्रकारिता विकास गर्न विभिन्न नयाँ–नयाँ खालका तालिम सञ्चालन गर्ने बताए । भक्तपुरका क्रियाशील सञ्चारकर्मीहरूलाई डिजिटल पत्रकारितासम्बन्धी प्रशिक्षण वीरेन्द्र धामी र एआईसम्बन्धी प्रशिक्षण जीवन भण्डारीले दिएका थिए ।