भक्तपुर । अभिभावक संघ नेपालले संस्थागत तथा निजी विद्यालयहरूमा चर्को भर्ना शुल्क नलिन आग्रह गर्दै सूर्यविनायक नगरपालिकामा ज्ञापनपत्र बुझाएको छ । नयाँ शैक्षिक सत्र सुरु हुन लागेपछि संस्थागत र निजी विद्यालयहरूले अभिभावकसँग चर्को शुल्क असुलेको भन्दै नगरपालिकामा सञ्चालित विद्यालयहरूमा अनुगमन गरी भर्ना शुल्कको विषयमा बुझ्न र बढी शुल्क लिए कारवाही गर्न नगर प्रमुख वासुदेव थापालाई आग्रह गर्दै आज शुक्रबार ज्ञापनपत्र बुझाएको अभिभावक संघ नेपाल भक्तपुरका उपाध्यक्ष राम सुवालले जानकारी दिए ।

ज्ञापनपत्रमा नगर शिक्षा शुल्क निर्धारण समितिमा अभिभावको पनि प्रतिनिधित्व हुने गरी समिति बनाउनुपर्ने माग गरिएको उनले बताए । नगर प्रमुख थापाले ज्ञापनपत्र बुझ्दै यस विषयमा शिक्षा समितिसँग छलफल गरी आवश्यक कार्यअगाडि बढाउने प्रतिबद्धता व्यक्त गरे । अभिभावकसँग भक्तपुरका चारवटै नगरपालिकामा ज्ञापनपत्र बुझाउने कार्यक्रम रहेको छ ।