काठमाडौं । राजावादीहरूको प्रदर्शनमा सुरक्षार्थ खटिएका एक जना सशस्त्र प्रहरीको टाउको फुटेको छ। प्रदर्शनकारीले गरेको आक्रमणमा परेर एक जना महिला सशस्त्र प्रहरी घाइते भएकी छन् । ती प्रहरीसँगै अन्य दुई प्रहरी पनि घाइते भएका छन्।

निजी सम्पत्तिमा आक्रमण नगर्न दुर्गा प्रसाईंको आग्रह

राजावादी आन्दोलनका कमाण्डर दुर्गा प्रसाईंले निजी सम्पत्तिमा तोडफोड नगर्न आग्रह गरेका छन् । तीनकुनेमा भएको प्रदर्शनका क्रममा निजी घरहरूमा प्रदर्शनकारीले ढुंगामुढा गरेपछि उनले सामाजिक सञ्जालमार्फत तोडफोड नगर्न आग्रह गरेका हुन् । ‘ प्रहरीकै दमनका कारण निजी सम्पत्तिमा क्षति पुग्यो । कैयन साथीहरू र प्रहरीहरू घाइते हुनुभएको छ यसप्रति दुस्ख व्यक्त गर्दै घाइते साथीहरुको शीघ्र स्वास्थ्य लाभको कामना गर्दछु । साथै कसैको निजी सम्पत्तिमा आक्रमण नगर्न म हार्दिक अपिल समेत गर्दछु’, उनले भनेका छन् ।

काठमाडौंका सीडीओ ऋषिराम तिवारीले तीनकुने क्षेत्र तनावग्रस्त रहेको बताएका छन् । सीडीओ तिवारीले अवस्था नियन्त्रणमा लिने प्रयास भइरेको बताएका छन् । तीनकुनेस्थित अन्नपूर्ण पोस्ट दैनिकको कार्यालयमा राजावादी प्रदर्शनकारीहरूले ढुंगामुढा गरेका छन् । अन्नपूर्ण पोस्टनजिकै रहेको भवनमा प्रदर्शनकारीले तोडफोड गरेका छन् । पेन्टागन कलेजनजिकै रहेको मार्बल हाउसको भवनमा व्यापक क्षति पुगेको छ ।

तीनकुने क्षेत्रबाट लखेटिएका राजावादी समूहका प्रदर्शनकारीहरूले कोटेश्वरस्थित पेरिसडाँडा क्षेत्रका सवारीसाधनमा आगजनी र तोडफोड गरेका छन् । एउटा गाडीमा आगजनी र एउटा बाइकमा तोडफोड भएको हो ।