संयम र सतर्क भएर अधिकार प्रयोग गर्न मुख्यमन्त्री लामाको आग्रह
भक्तपुर । बागमती प्रदेशका मुख्यमन्त्री बहादुरसिं लामाले संविधानले परिकल्पना गरेको तीन तहको सरकारबमोजिम बागमती प्रदेश सरकारले आफ्नो दायित्व निर्वाह गरिरहेको बताएका छन् । रफत सञ्चारक्लब भक्तपुरले आज शुक्रबार आयोजना गरेको रफत–सञ्चार–संवाद कार्यक्रममा उनले उक्त कुरा बताएका हुन् ।
मुख्यमन्त्री लामाले मुलुको वर्तमान राजनीतिक अवस्थाको चित्रण गर्दै भने, “गणतन्त्रवादी र राजावादीहरूको प्रदर्शनको कार्यक्रम एकै दिन नपर्ने पर्ने हो । तर एक अर्काले संयम र सतर्क भएर संविधान प्रदत्त अधिकारको उपभोग गर्दा राम्रो हुने । आफ्नो अधिकार प्रयोग गर्दा अर्काको अधिकारलाई सम्मान गर्नुपर्ने र लोकतान्त्रिक व्यवस्था भएकाले पनि आफ्नो असहमतिका कुरा राख्न पाएको हो ।”
उनले प्रदेश सरकारको काम कारवाहीको विवेचना गर्दै भने, “संविधानबमोजिम प्रदेश सरकार गठन भएपश्चात् कतिपय काम गर्न कानुनको अभाव रहेकाले आवश्यक ८२ देखि ८३ वटा नयाँ कानन पारित गरेर जनताका इच्छा–आकांक्षा परिपूर्ति गर्न तल्लीन रहेका छौं । यसका साथै बागमती सरकारले नागरिकलाई आफ्नो कामको फाइल कहाँ र कुन ठाउँमा पुग्यो भनेर थाहा पाउन एप्सको विकास गरेर उत्तरदायी भावनाको विकास गरेका छौं ।”
मुख्यमन्त्री लामाले बागमती प्रदेश सरकार गठन भएयता महिला, अपांग, यौनिक अल्पसंख्यक, दलित, शिक्षा, स्वास्थ्य र खेलकुद क्षेत्रका भौतिक पूर्वाधारमा अनगिन्ती काम गरेको जानकारी दिँदै उनले १३ सयभन्दा बढी बाटो बनाइसकेको, कच्ची र ग्राभेल सडक त असंख्य बनाएर जनताको जीवनशैलीलाई सहज र सुगम बनाउन टेवा पुर्याएको उल्लेख गरे । लामाले लोकतन्त्र र संघीयता रहे मात्र विकास–निर्माण हुन सक्छ भन्ने सन्देश पनि जनमानसमा पुर्याएको बताए ।
मुख्यमन्त्री लामाले भने, “संघले केन्द्रीय योजना र प्रदेशले मध्यम खालको र स्थानीय तहले स्थानीय आवश्यकताको विकास निर्माणको काम गर्ने हुनाले बागमती प्रदेश सरकार संवैधानिक व्यवस्थालाई टेवा पुर्याउने कार्य गरिरहेको छ ।” उनले हाल बागमती प्रदेश सरकारले स्थानीय सरकारलाई सार्वजनिक खरीद ऐनअनुसार विकास निर्माणका काम अगाडि बढाउन तालिम प्रशिक्षण उपलब्ध गराउँदै बेरुजु घटाउन मद्दत गरेको चर्चा गरे ।
