आज गणतन्त्रवादी र राजावादीहरूको शक्ति प्रदर्शन
काठमाडौं । आज काठमाडौंमा दुई राजनीतिक शक्तिले आ–आफ्नो तागत प्रदर्शन गर्दैछ । प्रदर्शनी मार्गमा गणतन्त्रवादी समाजवादी मोर्चा र कोटेश्वर–तीनकुनेमा व्यवस्था राष्ट्र–राजावादी समूहले प्रदर्शन गर्ने भएका छन् ।
नेकपा माओवादी केन्द्र, नेकपा एकीकृत समाजवादी, नेपाल समाजवादी पार्टी र विप्लव नेतृत्वको नेकपा सम्मिलित समाजवादी मोर्चाले गणतन्त्रको वकालत गर्नेछन् भने दुर्गा प्रसाँई ) राष्ट्र, राष्ट्रियता, धर्म, संस्कृति र नागरिक बचाउ महाअभियान) नवराज सुवेदी नेतृत्वको राजसंस्था पुनर्स्थापनाका लागि संयुक्त जनआन्दोलन समिति, राप्रपा, राप्रपा नेपाल र हिन्दुधर्म संघसंगठनका समर्थकहरूले गणतान्त्रिक व्यवस्थामा देखिएको विकृति, विसंगतिको सकेसम्म धज्जी उडाउने छन् । प्रदर्शनमा बढीभन्दा बढी सहभागिताका लागि दुबै पक्षले आवश्यक अभ्यास गरिसकेका छन् ।
दुबै पक्षको प्रदर्शनबाट कुनै अप्रिय घटना हुन नदिन उपत्यका प्रहरी कार्यालयले तीनकुने र प्रदर्शनीमार्गमा ठुलो संख्यामा दंगा नियन्त्रण प्रहरी परिचालन गर्ने भएको छ । वरिष्ठ प्रहरीको नेतृत्वमा ३५ सय प्रहरी खटाउने उपत्यका प्रहरी कार्यालयले तरखर गरेको बझिन आएको छ ।
