काठमाडौं । राष्ट्र–राजावादी आन्दोलनका सम्बन्धमा भद्दा टिप्पणी गरेका पूर्वप्रधानमन्त्री एवम् नेपाल समाजवादी पार्टी नेपालका अध्यक्ष डा बाबुराम भट्टराईलाई दाङमा कालो झण्डा देखाएर विरोध जनाएको छ । आज बिहीबार डा. भट्टराई बसेको होटल नजिक पुगेर राजसंस्था पुनर्स्थापना समर्थकहरूले कालोझण्डा देखाउँदै विरोध प्रदर्शन गरेका हुन् ।

राजावादी युवा समर्थक सन्देश भण्डारी क्षेत्री नेतृत्वको टोलीले कालो झण्डा देखाएको बताइएको छ । परुदर्शनकारीहरूले ‘संघीयता खारेज गर, धर्मनिरपेक्ष खारेज गर’ भन्ने नारा लगाउँदै भट्टराईविरुद्ध पनि नारा लगाएका थिए । जिल्ला प्रहरी कार्यालय दाङले कालोझण्डा देखाइएको बारेमा अनुसन्धान भइरहेको जनाएको छ । यता, राजावादी समूहका जन कमान्डर दुर्गा प्रसाईँले आफ्नै निवासमा पत्रकारहरूसँग कुरकानी गर्दै आज बाबुरामलाई दाङमा जनताले लखटेको प्रतिक्रिया दिएका छन् ।

यसअघि डा. भट्टराईले दाङमा आयोजित विभिन्न कार्यक्रममा राजावादी शक्तिलाई धेरै महत्व दिनु आवश्यक नरहेको,  राजावादी शक्ति अहिले चलमलाउनुले कुनै अर्थ नराख्ने, बाख्रा काटिसकेपछि उसको पुच्छर मात्रै हल्लिन्छ, यसले कुनै अर्थ राख्दैन,यो शक्तिसँग डराउनु वा महत्व दिनु आफैंमा मूर्खता हो भन्ने अभिव्यक्ति प्रकट गरेका थिए ।