काठमाडौं ।  राजतन्त्र पुनर्थापनाका लागि राष्ट्र–राजावादीहरूले भोलि १५ गतेदेखि घोषणा सभा गरेर चैत २१ गतेदेखि थप सशक्त बनाउने घोषणा गरेका छन्। वरिष्ठ राजनीज्ञि नवराज सुवेदीको संयोजकत्वमा गठन भएको ‘राजसंस्था पुनर्स्थापनाका लागि संयुक्त जनआन्दोलन समिति’ ले बिहीबार एक अपिल सार्वजनिक गर्दै चैत १५ गते काठमाडौंमा प्रदर्शन गर्ने, १७ गते थप आन्दोलनको घोषणा गर्ने र २१ गतेदेखि सशक्त प्रदर्शन गर्ने जनाएको हो।

संयोजक सुवेदीले आज एक पत्रकार सम्मेलन गरी जारी गरेको अपिलमा संवैधानिक राजसंस्थाको पुनर्स्थापना, सनातन हिन्दू अधिराज्यको पुनर्स्थापना, सङ्घीयता खारेजी र भ्रष्टाचार नियन्त्रण र सुशासनका लागि अभियान थालिएको जनाए ।

उनले वर्तमान संविधानमा सानातिना फेरबदल गरेर सम्भव छैन भन्दै २०४७ सालको संविधानलाई आधार मानेर २०७२ सालको संविधानका सकारात्मक प्रावधानहरूलाई समेट्दै प्रमुख राजनीतिक पक्षहरूबीच सहमति हुनुपर्ने बताए।

पत्रकार सम्मेलनमा सुवेदीले पूर्वराजा ज्ञानेन्द्र शाहलाई फेरि राजगद्दीमा फर्काउन गठन गरिएको संघार्ष समितिले भोलि शुक्रबार हुन लागेको आन्दोलनका लागि दुर्गा प्रसाईंलाई कमान्डर तोकेको हो । यस्तै समितिलाई सुझाव तथा सल्लाह प्रदान गर्नका लागि नेपाल डा जगमान गुरुङको संयोजकत्ववमा सल्लाहकार समिति गठन भएको जानकारी दिइयो भने राप्रपाका सांसद डा धवल शमशेर राणा संयोजक रहको ‘आन्दोलन परिचालन समिति’ मा देशभरीबाट १,१११ सदस्य चयन गरेको जानकारी दिइयो ।

जिल्ला प्रशासन कार्यालय काठमाडौंले उनीहरूको प्रदर्शनका लागि तीनकुनेलाई स्थान तोकेको छ । पत्रकार सम्मेलनअघि निर्मल निवासमा पुगेर पूर्वराजा ज्ञानेन्द्र शाहलाई प्रसाईं भेटेका हुन् । उनले पूर्वराजालाई भेटेपछि उत्साही बनेका छन् । यद्यपि, भेटघाटको कुुराकानीका विषय भने बाहिर आएको छैन ।