काठमाडौं ।  प्रधानमन्त्री केपी शर्मा ओलीले भोलि काठमाडौंमा के(के न हुने भनेर त्रास फैलाइएको भन्दै त्यस्तो केही नहुने दाबी बताएका छन् । आठौं अन्तर्राष्ट्रिय महिला उद्यमी व्यापार मेलालाई सम्बोधन गर्दै प्रधानमन्त्री ओलीले यस्तो बताएका हुन् । उनले तिललाई पहाड बनाउने काम भएको टिप्पणी गरे । ओलीले दैनिक १०–१५ हजार मान्छे उपस्थित भएको जुलुस निस्किरहेको भन्दै भोलि पनि त्यही हुने बताए ।

’प्रधानमन्त्री ओलीले भने, ‘१०-१५ हजारका जुलुस नेपालमा निस्किएको निस्किएकै छन् । तिललाई पहाड बनाइरहनु पर्दैन,एउटा भृकुटीमण्डपमा जुलुस निस्किएर सभा हुन्छ । एउटा कोटेश्वरमा सभा हुन्छ । यो सभा सधैं हुने गरेकै छ, भोलि पनि हुने त्यति नै हो । के-के न हुन्छ भनेर एउटा त्रास छ । त्यस्तो केही होइन । यस्ता कुराबाट वास्ता नगरेर हाम्रो विकासका काममा अघि बढ्नुपर्छ।’

भोलि (चैत १५) समाजवादी मोर्चामा संलग्न दलहरूले काठमाडौंमा संघीय लोकतान्त्रिक गणतन्त्रको पक्षमा प्रदर्शन गर्दैछन् भने राजावादी समूहले काठमाडौंमा प्रदर्शन गर्ने कार्यक्रम छ ।