काठमाडौं ।  नेकपा एमालेका युवा नेता महेश बस्नेत काठमाडौं महानगरपालिकाका मेयर बालेन साहको डोजर जति चल्यो चल्यो अब चल्न नदिने घोषणा गरेका छन् । उनले काठमाडौं टावरको नक्सा पाससम्बन्धी विवाद टुंग्याउन नसकेर दोषको भारी प्रमुख प्रशासकीय अधिकृतमाथि भिडाउने प्रयत्नमा सफल नभएपछि बालेनले प्रचार–प्रसार गर्दै स्टन्टबाजी गरेको आरोप लगाए ।

नेता बस्नेतले सामाजिक सञ्जालमार्फत बालेनको विरोध गर्दै भने, “बालेनले स्वकीय सचिव भूपदेव शाहमार्फत स्टन्टबाजी गरी अरूमाथि आरोप थुपार्ने काम गरेको जिकिर यदि प्रधानमन्त्री केपी शर्मा ओली र आफूहरूप्रति बालेनले रिसइबी साँधेको भए बालेनको डोजर जति चल्यो चल्यो, अब चल्न दिने छैन ।”

‘काठमाडौं टावरको नक्सा पास सम्बन्धी विवाद टुंग्याउन नसकेर दोषको भारी प्रमुख प्रशासकीय अधिकृतमाथि भिडाउने प्रयत्न सफल नभएपछि सरकारको मिलेमतो रहेको दावी गर्दै काठमाडौं महानगरको निर्णय भन्दै उक्त टावरको भवन भत्काउने निर्णय गरेको भनी आफ्नो स्वकीय सचिव भूपदेव शाहमार्फत मेयर बालेन शाहले प्रचारको अर्को स्टडन्टबाजी गर्न भ्याएछन्,’ सामाजिक सञ्जालमा उनले पथ लेखेका छन् । साथै, उनले बुधबार युवा संघले ‘भोलेन्टियर फोर्स’ गठन गरेको बताउँदै उनीहरूले नगर प्रहरीको प्रतिवाद गर्ने चेतावनीसमेत दिए।

उनले अगाडि थपेका छन्,’टावर भत्काउने यो निर्णय साँच्चै भएको हो भने उनको लागि यो घातक हुनेछ। आग्रह कुण्ठा र रिसइबी साँधेर प्रमुख प्रशासकीय अधिकृतलाई हतियार बनाएर सरकारसँग र एमालेसँग बालेन लड्न खोजेको हो भने जनता मारा उनका डोजर आजसम्म जति चले चल्यो अब चल्ने छैन। नगर प्रहरीहरूमाथि जनताले प्रतिवाद गर्नेछन् र जनताविरोधी उनको नगर प्रहरी र त्यसको नाइके राजु पाण्डेलाई जनताले लखेटने छन्। युवा संघको आज गठित भोलेन्टियर फोर्सले जनतालाई साथ दिनेछ।’

पुरानो बसपार्कमा निर्माणाधीन काठमाडौं टावरको नक्सा पाससम्बन्धी विषयले बालेन र प्रधानमन्त्री केपी शर्मा ओलीबीच मत भिन्नता बढेको पाइएको छ । महानगरका प्रमुख प्रशासकीय अधिकृत सरोज गुरागाईंले अनियमित तवरबाट काठमाडौं टावरको नक्सापास गरिदिएको आरोप मेयर साहले लगाएका थिए। यसमा सरकारको पनि मिलेमतो रहेको आशंका बालेनले गरेका छन्।