काठमाडौं । कोलकाता नाइट राइडर्स (केकेआर) ले समग्र उत्कृष्ट प्रदर्शन गर्दै राजस्थान रोयल्स (आरआर) लाई ८ विकेटले पराजित गर्दै जारी प्रतियोगितामा आफ्नो पहिलो जित दर्ता गरेको छ। गुवाहाटीस्थित बारसपारा क्रिकेट स्टेडियममा बुधबार राति सम्पन्न खेलमा टस हारेर पहिले ब्याटिङ गरेको राजस्थानले २० ओभरमा ९ विकेट गुमाएर १५१ रनको योगफल खडा गर्‍यो।

जवाफमा केकेआरले १७.३ ओभरमा २ विकेटको क्षतिमा लक्ष्य भेट्टाउँदै सहज जित निकाल्यो। यो जितसँगै कोलकाताले अंक तालिकामा छठौँ स्थानमा उक्लिएको छ। केकेआरको २ अंक रहेको छ । लगातार दुई खेल गुमाएको राजस्थान पुछारमा पुगेको छ। १५२ रनको लक्ष्य पछ्याएको केकेआरका लागि मोईन अली र क्विन्टन डिककले उत्कृष्ट सुरुवात दिलाए।

पहिलो विकेटका लागि यी दुईबीच ४१ रनको साझेदारी रह्यो। मोईन अली रनआउट भएपछि कप्तान अजिंक्य रहाणे मैदानमा प्रवेश गरे। डिकक र रहाणेले २४ बलमा २९ रनको साझेदारी गरे। ११औं ओभरको पहिलो बलमा रहाणेलाई वानिन्दु हसरंगाले तुषार देशपाण्डेको हातबाट क्याच गराउँदै पभेलियन पठाए। रहाणे १५ बलमा १८ रन बनाए।

त्यसपछि इम्प्याक्ट प्लेयरका रूपमा आएका अंगकृष रघुवंशीले डिककलाई साथ दिए। यी दुईबीच ८३ रनको अपराजित साझेदारी रह्यो। डिकक ९७ रनमा अविजित रहे भने रघुवंशी २२ रन बनाए। राजस्थानका लागि हसरंगाबाहेक अन्य कुनै पनि बलरले विकेट लिन सकेनन्। यस खेलमा राजस्थानले राम्रो सुरुवात गरेको थियो। यशस्वी जैसवाल र कप्तान संजू सामसनले पहिलो विकेटका लागि ३३ रनको साझेदारी गरे।

तर, चौथो ओभरमा वैभव अरोडाले विकेटकिपर सामसनलाई १३ रनमा बोल्ड गरे। त्यसपछि रियान परागले यशस्वीसँग मिलेर दोस्रो विकेटका लागि ३४ रनको साझेदारी गरे। परागले २५ रन बनाए। राजस्थानका लागि सर्वाधिक ३३ रन ध्रुव जुरेलले बनाए।

यशस्वी जैसवाल २५, नितीश राणा ८, वानिन्दु हसरंगा ४, शुभम दुबे ९, जोफ्रा आर्चर १६ रनमा आउट भए। महीश तीक्षणा र तुषार देशपाण्डे क्रमशः १ र २ रनमा अविजित रहे। केकेआरका लागि वैभव अरोड, हर्षित राणा, मोईन अली र वरुण चक्रवर्तीले समान २-२ विकेट लिए। स्पेन्सर जोनसनले अन्तिम ओभरमा जोफ्रा आर्चरलाई आउट गर्दै १ विकेट लिए। यो जितसँगै कोलकाता नाइट राइडर्सले प्रतियोगितामा पुनः लय समात्ने संकेत गरेको छ भने राजस्थान रोयल्सलाई लगातार दोस्रो हारपछि थप दबाब परेको छ।