काठमाडौं । पूर्वप्रधानमन्त्री डा. बाबुराम भट्टराईले संघीय लोकतान्त्रिक गणतन्त्रको उपलब्धिलाई दृढतापूर्वक कार्यान्वयन गर्नुपर्ने बताएका छन् । आज दाङको देउखुरीमा प्रदेश प्रशासनिक केन्द्रको निर्माणाधीन भवनहरुको स्थलगत अवलोकन गर्दै संघीय लोकतान्त्रिक गणतन्त्रका उपलब्धिहरुको रक्षा र अधिकार कार्यान्वयनलाई बलियो बनाउदै लैजानुपर्ने बताएका हुन् ।

उनले संघीय लोकतान्त्रिक गणतन्त्रको स्थायित्व र भविष्यको बारेमा पनि विचार व्यक्त गर्दै संघीय लोकतान्त्रिक गणतन्त्र लामो त्याग र बलिदानबाट प्राप्त भएको, यसलाई कुनै एक शक्तिको निगाहमा राखेर भविष्य निर्धारित गर्न नसकिने बताए । पूर्वप्रधानमन्त्री भट्टराईले संघीय पुनर्संरचनाबारे धारणा व्यक्त गर्दै यसलाई एक महत्वपूर्ण र युगान्तकारी परिवर्तनको रूपमा व्याख्या गरे । उनले लुम्बिनी प्रदेशले भौतिक संरचना र अन्य पूर्वाधारहरूको विकासमा सकारात्मक कदम चालेकोमा खुशी व्यक्त गर्दै, छिटो काम सम्पन्न हुने आशा व्यक्त गरे ।

मुख्यमन्त्री तथा मन्त्रिपरिषद् कार्यालय र अन्य नौै मन्त्रालयका गरी १० भवन निर्माणको काम अन्तिम चरणमा पुगेको छ । ३ अर्ब ९ करोडको लागतमा भवन निर्माणको काम चलिरहेको छ । अहिलेसम्म ७५ प्रतिशत भौतिक प्रगति हासिल भएको छ । २०७९ पुसमा निर्माण सुरु भएको भवन निर्माणको काम आगामी २०८२ पुसभित्र सम्पन्न गर्ने लक्ष्य राखिएको छ ।