राजसंस्था पुनःस्थापनार्थ राप्रपाको चैत २६ गते शक्ति प्रदर्शन
काठमाडौं । राष्ट्रिय प्रजातन्त्र पार्टी (राप्रपा) ले राजसंस्था पुनःस्थापनाका लागि चरणबद्ध आन्दोलनको घोषणा गरेको छ ।
राप्रपाले चैत २६ गते काठमाडौंमा बृहत् प्रदर्शन गर्ने निर्णय गरेको छ । मंगलबार बसेको आन्दोलन मूल समितिको बैठकले उक्त निर्णय गरेको अध्यक्ष राजेन्द्र लिङ्देनले जानकारी दिए । वैशाख ७ गतेबाट राजधानी केन्द्रित निरन्तर आन्दोलन सञ्चालन गर्ने योजना छ । ‘चैत २६ गते बागमती प्रदेशस्तरीय प्रदर्शन तथा सभा आयोजना गर्नेछौं र वैशाख ७ गतेबाट राजधानी केन्द्रित कार्यक्रम अघि बढाइनेछ,’ अध्यक्ष लिङ्देनले भने ।
उनले राजसंस्था पुनःस्थापनाको पक्षमा र संघीयताविरोधी आन्दोलनहरूलाई राप्रपाले समर्थन गर्ने स्पष्ट पारेका छन् । ‘राजसंस्था र हिन्दू राष्ट्र स्थापनाको पक्षमा गरिने कुनै पनि शान्तिपूर्ण आन्दोलनमा हामी समर्थन जनाउनेछौं,’ उनले थपे । आन्दोलनका लागि अन्य पक्षहरूसँग सहकार्य गर्न पनि राप्रपाले ढोका खुला राखेको छ ।
