नयाँ सिइओ र कुलमान प्रकरणले शेयर बजारमा गम्भीर असर
काठमाडौं । आज मंगलबार नेप्से सूचक ५८.०५ अंकले घटेर २५८२.७३ मा आएको छ । आज ५ अर्ब १८ करोड रुपैयाँभन्दा बढीको शेयर कारोबार भएको बजारमा सबै समूहका शेयर मूल्यमा गिरावट आएको छ । आज नेप्सेमा सूचीकृत १३ वटै समूहमा राताम्मे रहे ।
फाइनान्स समूह आज सर्वाधिक अर्थात ३.४१ प्रतिशतले घट्यो । बैंकिङ समूह पनि आज १.४० प्रतिशत, विकास बैंक ३.२६,होटल २.८३, हाईड्रो ३.०८,लगानी १.९८, जीवन बीमा २.२४, उत्पादन तथा प्रशोधन १.४९,लघुवित्त २.३०,म्युचुअल फण्ड ०.५१,निर्जीवन बीमा २.३८, अन्य १.६४ र व्यापार समूह १.६० प्रतिशतले घटेको छ ।
हिमालयन रि इन्स्योरेन्सको सर्वाधिक शेयर कारोबार भयो । आज यो कम्पनीको २३ करोड २० लाख बढीको कारोबार भयो । मंगलबारको बजारमा एनसीसी डिबेञ्चर २०८६ को मूल्य सर्वाधिक अर्थात ४.५२ प्रतिशतले बढ्यो । नारायणी डेभलपमेन्ट बैंकको शेयरमूल्य आज सर्वाधिक अर्थात ९.९७ प्रतिशतले घट्यो ।
सरकारले नेपाल स्टक एक्सचेञ्ज (नेप्से) को प्रमुख कार्यकारी अधिकृत (सीइओ) नियुक्त गरेकै भोलिपल्ट शेयर बजारमा पहिरो गएको छ । हिजो सोमबार बसेको मन्त्रिपरिषद् बैठकले नारदकुमार लुइँटेललाई नेप्सेको सिइओ नियुक्त गरेको थियो । सिईओ छनोट गरेपछि लगानीकर्ताहरूको मनोबल खस्किँदा शेयर बजारमा पहिरो गएको मानिएको छ ।
त्यस्तै, सरकारले हिजो विद्युत प्राधिकरणबाट कुलमान घिसिङलाई हटाउने निर्णय गरेपछि सरकारविरुद्धको आन्दोलन झनै चर्किने र मुलुकको राजनीति थप अन्योलग्रस्त बन्ने खतरा बढेकाले पनि यसको असर शेयर बजारमा देखिएको विश्लेषण गरिएको छ ।
