काठमाडौं । इन्डियन प्रिमियर लिगमा पाँच पटकको च्याम्पियन चेन्नइ सुपर किंग्सले जारी सिजनको आफ्नो पहिलो खेलमा सुखद सुरुवात गरेको छ।

आइतबार राति भएको खेलमा चेन्नइले मुम्मबइलाई ४ विकेटले पराजित गरेको हो। चेन्नइको जितमा नूर अहमदले ४ विकेट लिंदा खलील अहमदले ३ विकेट हात पारे।

चेपाक स्टेडियममा टस हारेर पहिले ब्याटिङ गरेको मुम्बइले निर्धारित २० ओभरमा ९ विकेट गुमाएर १ सय ५५ रनको स्कोर तयार गरेको थियो। जवाफमा चेन्नइले उक्त लक्ष्य १९.१ ओभरमा ६ विकेट गुमाएर पूरा गर्यो।

चेन्नइको जितमा डेब्यु ब्वाइ नुर अहमद म्यान अफ द म्याच घोषित भए। उनले ४ ओभरमा १८ रन दिएर ४ विकेट लिएका थिए। पहिले ब्याटिङ गरेको मुम्बइका लागि कप्तान सुर्य कुमार यादवले २९ रन बनाउनु सर्वाधिक रह्यो। उनी बाहेक दिपक चाहरले २८ रनको नटआउट इनिङ खेल्दा तिकल बर्माले ३१ रन बनाएका थिए।

जवाफमा चेन्नइका लागि ओपनर रचिन रविन्द्र ६५ रन बनाएर अविजित रहे। त्यस्तै ऋतुराज गायकवार्डले ५३ रन बनाएका थिए। तर गायकवार्ड आउट भएपछि भने निरन्तर विकेट गुमेको भएपनि चेन्नइले सहज जित निकाल्यो। प्रतियोगितामा आज राति ७:४५ मा दिल्ली र लखनउ भिड्ने छन्।