काठमाडौं । नेपाली कांग्रेसका सभापति एवम् पूर्वप्रधानमन्त्री शेरबहादुर देउवाले पूर्वराजा ज्ञानेन्द्र शाह संवैधानिक राजा हुन लायकको मान्छे नै नभएको र हुन पनि नसक्ने बताएका छन् । कांग्रेसका बागमती प्रदेश स्तरीय प्रशिक्षण कार्यक्रमको उद्घाटन गर्दै सभापति देउवाले पूर्वराजा ज्ञानेन्द्रलाई पार्टीको अध्यक्ष बनाउन राष्ट्रिय प्रजातन्त्र पार्टीलाई सुझाव दिए ।

सभापति देउवाले पूर्वराजा ज्ञानेन्द्रलाई पार्टी अध्यक्ष बनाउँदा पनि राप्रपा पछुताउने दाबीसमेत गरे । उनले भने, ‘बरु राप्रपाले पार्टी सभापति वा अध्यक्ष बनाए हुन्छ । पूर्वराजाले राजनीति नै गर्नु छ भने पार्टी खोलेर गरे भइहाल्यो । तर, त्यो पार्टीमा लाग्नेले पनि धेरै दुःख पाउँछन्।’ सभापति देउवाले भने, ‘यिनको बानी के छ, टेम्पारामेन्टले पनि यिनी कुनै पनि हालतमा संवैधानिक राजा बन्ने वाला छैनन् ।’