काठमाडौं । भक्तपुरमा ६६ वर्षीय पुरुषको शव भेटिएको छ । मध्यपुर ठिमी नगरपालिका–९ बोडे निलबाराहीस्थित पिकनिक स्पटको पार्किङ स्थलमा ६६ वर्षीय ओमप्रकाश राईको शव भेटिएको हो । उनको शव आइतबार बिहान करिब ५ः५५ बजेको समयमा भेटिएको जिल्ला प्रहरी परिसर भक्तपुरका सूचना अधिकारी एवं डिएसपी ढुण्डीराज न्यौपानेले जानकारी दिए ।
खोटाङको केपिलासगढी गाउँपालिका–२ घर भई हाल बोडे बस्ने राई कवाडीको सामान टिप्ने काम गर्ने गरेको प्रहरीले जनाएको छ । उनको दाहिने कानको छेउ र टाउकोमा चोट देखिएको अवस्थामा शव फेला परेको डिएसपी न्यौपानेले बताए । घटनाको सम्बन्धमा थप अनुसन्धान भइरहेको छ ।