भक्तपुर । भक्तपुर अस्पतालले आज बुधबार सामाजिक परीक्षणअन्तर्गत आमभेला कार्यक्रम सम्पन्न गरेको छ । नेपाल पत्रकार महासंघ जिल्ला शाखा भक्तपुरको समन्वयमा अस्पतालको सामाजिक परीक्षणअन्तर्गत आमभेला कार्यक्रम सम्पन्न भएको हो ।

कार्यक्रममा बागमती प्रदेशसभा सदस्य सुरेश श्रेष्ठले प्रदेश अस्पतालहरूमध्ये देशकै पहिलो र उत्कृष्ट अस्पताल बनाइ राख्न अस्पताल प्रशासन, विकास समिति, चिकित्सक तथा कर्माचारीहरूको महत्त्वपूर्ण भूमिका रहेको बताए । सांसद श्रेष्ठले देशभरका सरकारी अस्पतालमा सरसफाइको समस्या रहेको औंल्याउँदै भने, “यो समस्यालाई बेलैमा सम्बोधन गर्न भक्तपुर अस्पतालले विशेष ध्यान दिनुपर्दछ ।” स्वास्थ्य बीमाका कारण भक्तपुर अस्पतालमा बिरामीको चाप बढेको बताउँदै सांसद श्रेष्ठले भने, “स्वास्थ्य बीमालाई व्यवस्थित गरेर नियमित औषधी वितरणमा प्रशासनको भूमिका महत्त्वपूर्ण रहने भएकाले अस्पतालले यस्तो संवेदनशील विषयमा ध्यान दिनु पर्दछ ।”

उनले भक्तपुर अस्पतालले तीन महिनाभित्र सिटी स्क्यान सेवा सुरु गर्ने बताउँदै भने, “एमआरआई र रोबोट प्रविधिबाट उपचार गर्न बागमती प्रदेश सरकारलाई स्वास्थ्यमन्त्रीमार्फत आग्रह गरिसकेका छौं । संघीय स्वास्थ्यमन्त्री प्रदीप पौडेलमार्फत भक्तपुर अस्पतालमा डायलाइसिस मेसिन खरिद गर्न पहल गरिरहेको र भक्तपुर अस्पतालमा भवन अभावकै कारण सोचेअनुरूपको सेवा प्रदान गर्न सकिरहेको छैन ।”

कार्यक्रममा भक्तपुर जिल्लाका प्रमुख जिल्ला अधिकारी गोपालप्रसाद अर्यालले समाजिक परीक्षणमा अस्पतालले दिने सेवा प्रवाहमा भन्दा पनि कति मानिसहरूले स्वास्थ्यलाभ लिन सके त्यो महत्त्वपूर्ण पाटो रहने बताए । उनले भक्तपुर अस्पतालले सेवा वृद्धिभन्दा पनि भएका सेवालाई गुणस्तरीयतामा रूपान्तरण गर्न जोड दिए ।

कार्यक्रममा अस्पतालका निमित्त निर्देशक सुरेन्द्र भट्टले अस्पतालले दिएका सेवा र सुविधा तथा अस्पतालको वर्तमान अवस्थाको विषयमा जानकारी दिएका थिए । कार्यक्रममा राष्ट्रिय उपभोक्ता मञ्चका अध्यक्ष मनोज थापाले उपोभोक्ता अदालत गठन भइसकेकाले विभिन्न सेवामा ठगिएका उपभोक्ताले उजुरी दिने व्यवस्था रहेको बताए । उनले भक्तपुर अस्पतालमा स्वास्थ्य बीमासम्बन्धी धेरै उपभोक्ताहरूको गुनासो रहेको बताए ।

कार्यक्रममा जिल्ला स्वास्थ्य कार्यालयका प्रमुख शान्तिराम खतिवडाले विगतदेखि नै अस्पतालको हरेक गतिविधिबारे जानकार रहेको बताउँदै उनले अस्पताललाई एक नम्बर बनाइ राख्न अस्पतालका हरेक तह र तप्काको महत्त्वपूण भूमिका रहेको बताए ।

कार्यक्रममा नेपाल पत्रकार महासंघका अध्यक्ष सु्न्दर शिल्पकारले अस्तालका नर्स तथा चिकित्सक र कर्मचारीहरूले सेवाग्राहीलाई मुस्कानसहितको सेवा दिनुपर्नेमा जोड दिए । कार्यक्रममा भक्तपुर अस्पतालका अध्यक्ष शशिजंग थापाले आम भेलामा उठेका जिज्ञासाको विषयमा सम्बोधन गर्न अस्पतालले सरसफाइमा विषेश ध्यान दिएको, अस्पतालमा आएका सेवाग्राहीहरूलाई मुस्कानसहितको सेवा दिएको, विभिन्न विभागमा विशिष्टकृत सेवा दिएको, स्वास्थ्य बीमाबाट दिने सेवालाई अझ परिष्कृत गरेको दाबी गरे । उनले आगामी दिनमा गुनासो आउन नदिने वातावरण तयारी गरिएको बताउँदै फेरि पनि अस्पताल पहिलो स्थानमै चयन हुने गरी नै काम गरिरहेको उनको दाबी थियो ।