भारतद्वारा सेतो मच्छिन्द्रनाथको आशन बनाउन २४ किलो चाँदी सहयोग
काठमाडौं । काठमाडौंको जन बहालस्थित सेतो मच्छिन्द्रनाथको मन्दिरका लागि भारत सरकारले २४ किलोग्राम चाँदी हस्तान्तरण गरेको छ । भारतको तर्फबाट नेपालस्थित भारतीय दूतावासले बुधवार बिहान २४ किलोग्राम चाँदी हस्तान्तरण गरेको हो ।
२०७२ सालमा भूकम्पले क्षति पुर्याएको सेतो मच्छिन्द्रनाथको मन्दिर पुरातत्त्व विभागबाट स्वीकृति भएर भारत सरकारको सहयोगमा निर्माण भइरहेको छ । मन्दिर पुनः निर्माण २०७७ साल माघ २९ गतेदेखि पुनः निर्माण कार्य भइरहेको छ ।
हालसम्मको मन्दिरको भौतिक प्रगति ७५ प्रतिशत रहेको र वित्तीय प्रगति ४२.१८ प्रतिशत रहेको बताइएको छ । तत्कालीन समयमा लागत अनुमान गर्दा चाँदीको आशनलगायतका कार्यहरू समावेश नभएकाले चाँदीको आशन राख्नको लागि २४ किलोग्राम चाँदी दान गरिएको हो । चाँदीको लागि भारत सरकारबाट ३९ लाख १० हजारबराबरको रकम स्वीकृत भएको थियो । अब चाँदीको आशनको बुट्टा कुँदेर मन्दिरमा राख्ने प्रक्रिया अघि बढाइने बताइएको छ ।
