काठमाडौं । गणतन्त्र शासन प्रणालीका कट्टर विरोधी एवं नेपाललाई हिन्दुराज्य बनाउनुपर्ने मतका हिमायती दुर्गा प्रसाइंले राजवादी दलहरू राप्रपा नेपाल र राप्रपाका नेताहरूमाथि राजनीति गरेको आरोप लगाएका छन् । प्रसाईंले राजेन्द्र लिङ्देन र कमल थापाहरूले आफूलाई नपढेको र केही नबुझ्नेजस्तो व्यवहार गरेर कहिले के समिति बनाउने? त कहिले के ? गर्ने गरेको भन्दै तीव्र आक्रोश व्यक्त गरेका छन् ।

नेपालमा गणतान्त्रिक शासन प्रणाली स्थानमा राजसंस्था र हिन्दुराज्य स्थापना गर्न हाल चलाइरहेको आन्दोलनको सिलसिलामा आज बुधबार आयोजित पत्रकार सम्मेलनमा प्रसाईंले आफू राजाको नजिक हुनेभन्दा पनि जनताको नजिक हुने भन्दै राजा र जनताको आँखाबाट आँशु झर्न नदिने प्रतिबद्धता व्यक्त गरे ।

हिजो हामीले धेरै राष्ट्रवादी शक्तिसँग अनुनय विनय गर्‍यौँ । राजा र हिन्दु राष्ट्रको पक्षमा उभिएका कमल थापा र राजेन्द्र लिङदेन, रवीन्द्र मिश्र र धवलशम्शेरसँग अनुनय विनय गर्‍यौँ तर उहाँहरू धेरै ठुलो राजनीति गर्नुहुँदो रहेछ’, प्रसाईंले भने, ‘मानौँ यो अभियानलाई त कस्तो सम्झेको रहेछ भने दुर्गा प्रसाईं पढेलेखेको छैन, बुझ्दैन, जे गर्दा पनि हुन्छ भनेर कहिले यता कमिटी बनाउने, कहिले उता कमिटी बनाउने, कहिले आफैँ आन्दोलन गर्ने गर्नुभयो ।’

प्रसाईंले चैत १५ गते हुने प्रदर्शनमा हरेक नागरिक देशको रक्षा गर्न खुकुरी बोकेर आउने भन्दै गणतन्त्रको अन्त्य नगरी नागरिकले सुख नपाउने दाबीसमेत गरे ।