७० वर्षपछि न्यूक्यासललाई ठूलो सफलता

काठमाडौं ।  न्यूक्यासल युनाइटेडका समर्थकहरू आशा र डरको मिश्रित भाव लिएर वेम्ब्ली रंगशालामा पुगेका थिए । उनीहरूको अन्तिम घरेलु उपाधि सन् १९५५ मा आएको थियो । त्यसपछि उनीहरूले लामो समयसम्म उपाधिको स्वाद चाख्न पाएनन् । तर, अन्ततः न्यूक्यासलका लागि त्यो ऐतिहासिक दिन आएको छ । अर्थात् काराबाओ कपको फाइनलमा न्यूक्यासलले लिभरपुललाई २–१ ले पराजित गर्दै घरेलु फुटबलमा ७० वर्षपछि ठूलो सफलता हात पारेको छ ।

खेलको पहिलो हाफमा ड्यान बर्नले हेडर गोलले न्यूक्यासललाई अग्रता दिलायो । दोस्रो हाफको सुरुमा एलेक्जान्डर इसाकले उत्कृष्ट भली गोल गर्दै टिमको जित सुनिश्चित गरेका थिए । लिभरपुलले अन्तिम समयमा फेडेरिको किएसाको गोलमार्फत स्कोर घटाए पनि त्यो पर्याप्त रहेन । न्यूक्यासलका खेलाडीहरू शारीरिक रूपमा दरो, आक्रामक र ऊर्जाशील देखिए, जसका कारण लिभरपुल निरिह देखियो । प्रशिक्षक एडी हाउको योजनाबद्ध रणनीतिले न्यूक्यासललाई ऐतिहासिक जिततर्फ अघि बढायो ।

सन् २०२१ मा जब एडी हाउ न्यूक्यासलका प्रशिक्षक बने, टिम रेलिगेसन जोनमा संघर्षरत थियो । उनले टिमलाई स्थिरता दिलाए, आत्मसम्मान फर्काए, प्रिमियर लिगमा बलियो बनाए र च्याम्पियन्स लिगसम्म पुर्‍याए ।

सन् २०२३ मा पेरिस सेन्ट–जर्मेनविरुद्धको च्याम्पियन्स लिग जित ऐतिहासिक रह्यो । तर यो उपाधि त्यसभन्दा ठूलो क्षण बन्यो । न्यूक्यासलका लागि यो केवल एउटा जित मात्र होइन, एउटा युगान्तकारी उपलब्धि पनि सावित भएको अन्तर्राष्ट्रिय सञ्चारमाध्यमले जनाएका छन् ।

लिभरपुलले गत हप्ता च्याम्पियन्स लिगको अन्तिम १६ चरणमा पीएसजीसँग पराजित भएपछि सुधारको आशा गरिएको थियो । तर, उनीहरू न्यूक्यासलको तीव्र गतिका अगाडि निरीह बने । लिभरपुलका प्रशिक्षक आर्ने स्लटले आफ्नो टिमको कमजोरी स्वीकार गर्दै भने, ‘हामी न्यूक्यासलको शैलीअनुसार खेलियौं, तर जित्न सक्दैनथ्यौं ।’

खेल अवधिभर न्यूक्यासलका समर्थकहरूले उत्साहपूर्वक आफ्ना खेलाडीहरूलाई समर्थन गरे । वेम्ब्ली रंगशालामा कालो–सेतो स्कार्फहरू फर्फराइरहेका थिए । समर्थकहरूको जोशले खेलाडीहरूलाई थप प्रेरित गरेको थियो ।

ड्यान बर्नको गोल हुँदा स्टेडियममा उत्साहको लहर देखियो । एन्ट एण्ड डेक, एलन शियरर लगायतका चर्चित अनुहारहरू खुसीले झुमेका थिए । न्यूक्यासलका समर्थकहरूले आफ्नो टिमलाई ऐतिहासिक विजय दिलाएकोमा गर्व गरेका छन् ।

न्यूक्यासल युनाइटेडका लागि यो उपाधि मात्र होइन, नयाँ युगको संकेत हो । टिमको प्रदर्शनले देखाएको छ कि उनीहरू अब इंग्लिस फुटबलको शीर्ष स्थानमा दाबी गर्न तयार छन् । यो विजय केवल एउटा कप जित्ने क्षण मात्र होइन, न्यूक्यासलका लागि फुटबल इतिहास  पुनर्लेखन गर्ने अवसर पनि हो ।


प्रतिक्रिया

Leave a Reply

Your email address will not be published. Required fields are marked *

सम्बन्धित खबर