काठमाडौं । क्यानाडाको लिबरल पार्टीका नेता मार्क कार्नीले प्रधानमन्त्रीको शपथ लिएका छन् । कार्नीले क्यानाडाको आधिकारिक भाषा अंग्रेजी र फ्रान्सेलीमा शपथ लिएका थिए । उनले क्यानाडाका राजा चार्ल्स तृतीय, साथै उनका उत्तराधिकारी र उत्तराधिकारीहरूप्रति निष्ठा राख्दै शपथ लिए । कार्नीसहित उनको क्याबिनेटका मन्त्रीहरुले पनि शपथ लिएका छन् । कार्नीले पूर्वप्रधानमन्त्री जस्टिन ट्रुडोको स्थान लिएका हुन् । उनले कुल १३१,६७४ मत अर्थात ८५.९ प्रतिशत मत प्राप्त गर्दै पार्टी नेताको चुनाव जितेका थिए ।
मार्क कार्नीको जन्म मार्च १६, १९६५ मा क्यानडाको उत्तर–पश्चिममा रहेको फोर्ट स्मिथमा भएको थियो । यद्यपि, उनको सुरुवाती जीवन अल्बर्टाको एडमन्टनमा बित्यो । मार्कका आमा–बाबु दुवै स्कुल शिक्षक थिए । उनी सुरुदेखि नै पढाइमा धेरै राम्रो थिए । मार्क कार्नीले २००४ मा क्यानाडाली वित्त विभागमा पनि काम गरेका थिए । अर्थशास्त्रको क्षेत्रमा प्रतिभा देखाएपछि उनलाई २००७ मा बैंक अफ क्यानडाको गभर्नर बनाइएको थियो ।

भनिन्छ, २००७ को अन्त्यतिर जब विश्वभर आर्थिक उथलपुथल सुरु भयो, मार्क कार्नीले आसन्न खतराहरू महसुस गरिसकेका थिए । यसकारण उनले क्यानडाको मौद्रिक नीतिलाई कडा बनाउन थाले । लेहमन ब्रदर्सको दिवालियापन पछि विश्व मन्दीमा डुबेको बेला २००८ मा कार्नीले क्यानडाको केन्द्रीय बैंकको नेतृत्व गरेका थिए । उनको व्यवस्थापन कौशललाई क्यानडामा यति उच्च सम्मान गरिएको थियो कि उनी २०१३ मा बैंक अफ इंग्ल्याण्डको गभर्नर नबन्दासम्म क्यानाडाको गभर्नर नै रहेका थिए ।