काठमाडौं ।  अमेरिकी राष्ट्रपति डोनाल्ड ट्रम्पले सत्तामा फर्किएपछि पहिलोपटक अमेरिकी कङ्ग्रेस (संसद्) लाई सम्बोधन गर्दै ‘अमेरिका इज ब्याक’ (अमेरिका फर्किएको)  घोषणा गरेका छन्। राष्ट्रपति ट्रम्पले अर्बपति सल्लाहकार इलोन मस्कले संघीय कर्मचारीतन्त्रमा गरेको विवादास्पद हस्तक्षेपको बारम्बार प्रशंसा गर्दै भने, ‘मेरो प्रशासन भर्खर सुरु हुँदै छ।’

सन् २००० मा बिल क्लिन्टनको ‘स्टेट अफ द युनियन’ को भाषणको लम्बाइलाई रेकर्ड तोडेको एक घण्टा ४० मिनेट लामो भाषणमा ट्रम्पले भने, ‘अमेरिकी सपना अजेय छ।’ जेम्स ट्रस्लो एडम्सद्वारा १९३१ मा महामन्दीको समयमा लोकप्रिय भएको ‘अमेरिकन ड्रिम्स’ भनेको संयुक्त राज्य अमेरिकाको राष्ट्रिय लोकाचार जनाउने वाक्यांश हो। यसको अर्थ अमेरिकी प्रत्येक व्यक्तिसँग सफल हुने र राम्रो जीवन प्राप्त गर्ने स्वतन्त्रता र अवसर छ भन्ने हो।

लगभग हरेक वाक्यांशसँगै रिपब्लिकन पार्टीका सदस्यहरूबाट ठूलो तालीको गडगडाहट पाएको उक्त सम्बोधनमा ट्रम्पले छुट्टाछुट्टै दुईपटक स्पेसएक्स र टेस्लाका मालिक मस्कको नाम उच्चारण गरे। सम्बोधनमा तालीको गडगडाहटकै केही मिनेटमै विपक्षी सांसद्‌बाट विरोध गरिएको थियो। विरोधका क्रममा स्वास्थ्य सेवाका कार्यक्रमको ट्रम्पको विरोध गरिरहेका डेमोक्र्याटहरूले चुपचाप ‘झुटो’, ‘मस्कले चोरी गरे’ र ‘यो झुट हो’ जस्ता प्लेकार्ड बोकेर सभाहलमा उभिएका थिए।

विरोधको कुनै एक क्षणमा अधिकांश डेमोक्र्याटहरूले ट्रम्पले आफ्नो चुनावी हार स्वीकार गर्न अस्वीकार गरेको सन् २०२१ जनवरी ६ मा क्यापिटलमा ट्रम्पका समर्थकहरूले हिंसात्मक आक्रमणको विगत कोट्याउने प्रयास गर्दै ‘जनवरी ६’ भनेर नारा लगाएका थिए। अठहत्तर वर्षीय राष्ट्रपति ट्रम्पले आफ्नो दोस्रो कार्यकालको पहिलो ६ हप्ताको प्रशंसा गर्दै अमेरिकी सरकारलाई नयाँ आकार दिन र युक्रेन युद्ध अन्त्यका लागि आफ्नो ध्रुवीकरणको प्रयास जारी राख्ने प्रतिबद्धता व्यक्त गरे।