जापानमा तीन दशकयताकै ठूलो वन डढेलो
काठमाडौं । जापानले तीन दशकयताकै ठूलो वन डढेलो निभाउन दुई हजारभन्दा बढी अग्निनियन्त्रकहरू परिचालन गरेको छ । अग्नि तथा प्रकोप व्यवस्थापन एजेन्सीका अनुसार, बिहीबारदेखि उत्तरी जापानी सहर ओफुनाटो वरपर ५,२०० एकडभन्दा बढी क्षेत्र जलिरहेको आगलागीमा परी कम्तीमा एक जनाको मृत्यु भएको छ ।
जनवरीदेखि मार्चसम्म सामान्यतया ओफुनाटोको सबैभन्दा सुख्खा मौसम हुन्छ, तर यस वर्ष उक्त क्षेत्रमा पछिल्ला २० वर्षमा फेब्रुअरी महिनामा सबैभन्दा कम वर्षा भएको छ । यस क्षेत्रमा औसत ४१ मिलिमिटर पर्ने पानी यो पटक २.५ मिलिमिटर मात्र मापन गरिएको थियो ।
आगो अझै नियन्त्रणमा नआएकाले करिब ४,६०० मानिसहरूलाई उद्धार गरिसकिएको छ । अहिलेसम्म करिब दुई हजार मानिसहरू आफ्ना साथी वा आफन्तहरूसँग बस्नका लागि उक्त क्षेत्र छोडिसकेका छन्, भने बाह्र सय भन्दा बढी मानिसहरू आश्रयस्थलहरूमा सारिएका छन् ।
यो डढेलो इवाते प्रिफेक्चरको वन क्षेत्रमा फैलिएको छ, जुन जापानको दोस्रो ठूलो प्रिफेक्चर हो र देशको दोस्रो कम जनसंख्या घनत्व भएको क्षेत्र पनि हो । हालसम्म ८० भन्दा बढी भवनहरू क्षतिग्रस्त भएको अनुमान गरिएको छ, यद्यपि विस्तृत विवरणहरू अझै मूल्यांकन गरिरहेको जनाइएको छ ।
टोकियोसहित १४ वटा प्रिफेक्चरहरूबाट हजारौं अग्निनियन्त्रकहरू आगलागी नियन्त्रणका लागि खटिएका छन् । आगो नियन्त्रण गर्न कम्तीमा १६ वटा हेलिकप्टरहरू पनि प्रयोग गरिएका छन् । अन्य धेरै देशहरूझैँ, जापानले सन् २०२४ मा अहिलेसम्मकै सबैभन्दा तातो वर्षको रेकर्ड राखेको छ ।
