काठमाडौं। मार्को असेन्सियोले दोस्रो हाफमा गरेको दुई उत्कृष्ट गोलसँगै एस्टन भिल्ला एक दशकपछि एफए कपको क्वार्टरफाइनलमा पुगेको छ।

भिल्ला पार्कमा शुक्रबार सम्पन्न खेलमा कार्डिफ सिटीलाई २–० ले पराजित गर्दै भिल्लाले अन्तिम आठमा स्थान पक्का गरेको हो।

जनवरी ट्रान्सफर विन्डोमा पेरिस सेन्ट जर्मेन (पिएसजी) बाट लोनमा आएका स्पेनिस स्ट्राइकर असेन्सियोले गत साता चेल्सीविरुद्ध २–१ को जितमा पनि दुई गोल गरेका थिए। उनले प्रशिक्षक उनाइ एमरीको विश्वासलाई तेस्रो खेलमै सही साबित गरे।

पहिलो गोलमा उनले बायाँ विंगबाट मार्कस रासफोर्डको कटब्याक पास पाए र सहज रूपमा बल जाली चुमाए। त्यसको १२ मिनेटपछि उनले ओली वाट्किन्सको पासमा आफूलाई सन्तुलित गर्दै दायाँ खुट्टाले बल पोस्टभित्र छिराए।