काठमाडौं । आईसीसी च्याम्पियन्स ट्रफी २०२५ को समूह चरणको अन्तिम खेलमा अफगानिस्तान र अष्ट्रेलियाबीच महत्त्वपूर्ण भिडन्त हुँदैछ।यो खेल सेमिफाइनल प्रवेशका लागि क्वाटरफाइनलसरह हुनेछ, जसमा विजयी टोलीले अन्तिम चारमा स्थान बनाउनेछ। अफगानिस्तान र अष्ट्रेलियाले पछिल्ला आईसीसी प्रतियोगिताहरूमा रोमाञ्चक खेलेका छन्।

२०२३ को एकदिवसीय विश्वकपमा ग्लेन म्याक्सवेलको ऐतिहासिक इनिङ्सले अष्ट्रेलियालाई जित दिलाएको थियो भने २०२४ को टी-२० विश्वकपमा अफगानिस्तानले अष्ट्रेलियालाई हराउँदै बदला लिएको थियो।

अफगानिस्तानले हालैको खेलमा इंग्ल्यान्डलाई हराउँदै उच्च मनोबल बनाएको छ। त्यसअघि दक्षिण अफ्रिकासँग १०७ रनको हार बेहोरेको थियो। च्याम्पियन्स ट्रफी अघि अफगानिस्तानले आयरल्यान्ड, दक्षिण अफ्रिका, बंगलादेश र जिम्बाबेसँगको पछिल्ला चार ओटा द्विपक्षीय सिरिज जितेको थियो।

अष्ट्रेलियाले आफ्नो पहिलो खेलमा इंग्ल्यान्डलाई पराजित गरेको थियो भने दक्षिण अफ्रिकासँगको खेल वर्षाका कारण प्रभावित भएको थियो।टिम केही कमजोर देखिएको छ, विशेष गरी बलिङमा । प्याट कमिन्स, मिचेल स्टार्क र जोश हेजलउडजस्ता प्रमुख बलरहरू अनुपस्थित छन्।

इंग्ल्यान्डविरुद्ध १४६ बलमा १७७ रनको ऐतिहासिक इनिङ्स खेलेपछि इब्राहिम जादरान अफगानिस्तानको प्रमुख खेलाडीका रूपमा उभिएका छन्। अष्ट्रेलियाको अनुभवहीन बलिङ आक्रमणविरुद्ध उनको प्रदर्शन निर्णायक हुनेछ। अफगानिस्तानको शीर्षक्रमलाई रोक्न अष्ट्रेलियाका तीव्र गतिका बलर स्पेन्सर जोनसनको भूमिका महत्त्वपूर्ण हुनेछ। इंग्ल्यान्डविरुद्ध उनले ७ ओभरमा ५४ रन खर्चेका थिए, जसलाई सुधार्ने लक्ष्य उनका लागि रहनेछ।