नो केबलकार समूहमाथि बल प्रयोग नगर्न प्रचण्डको चेतावनी
काठमाडौं । नेकपा माओवादी केन्द्रको सोमबार झापाको केचनाकवलबाट सुरु भएको ‘जनतासँग माओवादी–तराई मधेश जागरण अभियान’ मङ्गलबार मोरङ आइपुगेको छ ।
मोरङमा बिहानैदेखि माओवादी केन्द्रका अध्यक्ष पुष्पकमल दाहाल ‘प्रचण्ड’लगायत केन्द्रीय नेतृत्वको टोली विभिन्न कार्यक्रममा सहभागी भइरहेको छ । बिहान ८ बजे मोरङको पथरी बजारमा स्थानीयवासी र कार्यकर्ताहरुले उक्त टोलीलाई स्वागत गरेको थियो । त्यसपछि मोरङको कानेपोखरी गाउँपालिकास्थित रमाइलोमा सहिद लक्ष्मी फुँयलको घरमा पुगेर अध्यक्ष प्रचण्डलगायत नेताहरुले सहिद परिवारसँग भेटघाट गरे ।
शहीद परिवारको कुरा सुनेपछि रमाइलो बजारमा आयोजना गरिएको जनसभामा भाग लिन पुगेका अध्यक्ष प्रचण्डले त्यहाँ नेपाली कांग्रेसमा लामो समय आवद्ध रहँदै आएका जयराज संयोग लिम्बूलगायत विभिन्न पार्टीबाट सयौं व्यक्तिलाई पार्टीमा प्रवेश गराए । माओवादी केन्द्र मोरङले कानेपोखरीका करिब नौ सय जना र अन्य पालिकाका एक सय जना पार्टी प्रवेश गरेको जनाएको छ ।
जनसभामा अध्यक्ष प्रचण्डले ताप्लेजुङमा सरकारले केबलकार बन्न हुँदैन भन्नेहरुलाई बल प्रयोग गरिरहेको भन्दै त्यस्तो नगर्न आग्रह गरे । उनले दमनबाट नभएर वार्ताबाट समाधान खोज्न आग्रह गर्दै अनावश्यक दमन भएमा माओवादीले आन्दोलन गरिरहेकाहरुलाई साथ दिने पनि बताए ।
अभियानअन्तर्गत केन्द्रीय टोलीले एक दिन, एक जिल्ला, एक जिल्ला तीन मुख्य कार्यक्रमको मोडलमा कार्यकर्ताहरुलाई परिचालन गर्दै आएको छ । जसअनुसार आज मोरङको कानेपोखरीको रमाइलो बजार, आमबारी रतुवामाई र कर्सिया धनपालथानमा सभा गर्दैछ भने सहिद परिवार, विभिन्न समुदाय र नागरिक समाजसँग भेटघाट र अन्तरक्रिया पनि गरिरहेको छ । तत्कालीन नेकपा माओवादीको नेतृत्वमा भएको जनयुद्ध (सशस्त्र संघर्ष) का क्रममा मोरङमा १२६ जना सहिद भएका थिए भने २२ जना अझै बेपत्ता छन् ।
