काठमाडौं । नेपाली कांग्रेसकी सांसद ईश्वरीदेवी न्यौपानेले पूर्वराजा ज्ञानेन्द्र शाहलाई सत्तामा नै आउने चाहना भए निर्वाचनमा भाग लिन चुनौती दिएकी छन् । आइतबार प्रतिनिधिसभाको बैठकमा बोल्दै सांसद न्यौपानेले कसैको कृपाले सत्तामा फर्किने नसोच्न चेतावनी दिएकी हुन् ।

उनले भनेकी छन्- ‘सत्तामा नै फर्कन चाहना छ भने टीका लगाएर वा कसैको कृपाले होइन, नागरिकले पाउने सुविधाको उपभोग गर्दै २०८४ को चुनावमा भाग लिने हिम्मत गर्नुस् । पूर्वराजा र समर्थकहरूलाई मेरो सुझाव छ, कहिल्यै पूरा नहुने झर्ला र खाउँला भन्ने सोचाइ त्यागिदिनुस् ।’ उनले प्रजातन्त्र दिवसको पूर्वसन्ध्यामा पूर्वराजाको सन्देशले तरंग पैदा भएको बताउदै गणतन्त्रमाथि प्रहार स्वीकार्य नभएको बताएकी थिइन् ।

‘लोकतान्त्रिक गणतन्त्र कसैको कृपाले आएको होइन। नेपाली जनताको शक्तिले हासिल गरको हो, लोकतन्त्रको विकल्प लोकतन्त्रभन्दा अर्को कुनै हुनै सक्दैन। व्यक्ति गलत हुनसक्छ, व्यक्तिले गल्ती गर्न सक्छ। विधिको शासनमा गल्ती सच्याउने र सजाय गर्ने पनि विधि नै हुन्छ। त्यो विधिलाई छलफल गरेर अझ पार्दर्शी र कसिलो बनाउन सकिन्छ। गल्ती गर्नेलाई दण्डित गर्न सकिन्छ। तर, कुनैपनि बहाना गरेर गणतन्त्रमाथिको प्रहार स्वीकार्य छैन। पछिल्ला दिनहरुमा संसद् जनताको समस्या छलफल गर्ने भन्दापनि एकअर्कालाई आरोप-प्रत्यारोप गर्ने थलोजस्तो देखिँदै छ। संसद् मर्यादित भन्दा पनि अराजक भयो भन्ने गुनासो थुनिन थालेको छ । लोकतान्त्रिक गणतन्त्रका लागि लडेकाहरु सचेत हुन जरुरी छ। व्यवस्थामाथि वितृष्णा फैलाउन चालिएको चाल त होइनन्?’ प्रश्न गर्दै उनले भनिन्।