काठमाडौं ।  दक्षिण कोरियाका राष्ट्रपति यूनलाई पक्राउ गर्न उनको निवास प्रवेश गरेको भ्रष्टाचार अनुसन्धान कार्यालयले राष्ट्रपतिको सुरक्षा टोलीले अवरोध गरेका कारण गिरफ्तार गर्न नसकेको जनाएको छ । उनलाई पक्राउ गरेर छानबिन गर्ने जिम्मेवारी पाएको संयुक्त अनुसन्धान मुख्यालयले एक सार्वजनिक सूचना जारी गर्दै भनेको छ, ‘अवरोधका कारण पक्राउ राष्ट्रपति यूनलाई पक्राउ गर्न सकिएको छैन ।’

कोरियाका अपदस्थ राष्ट्रपतिमाथि कानूनी प्रक्रिया पालना नगरेको भन्दै मुख्यालयले गम्भीर आपत्ति जनाएको छ । स्थानीय समयअनुसार शुक्रवार बिहान सवा ६ बजे सार्वजनिक अभियोजन कार्यालयका अनुसन्धान टोली ग्वाचियोनबाट प्रस्थान गरी सवा ७ बजे २० बजे राष्ट्रपति निवास नजिक पुगेका थिए ।

मुख्य प्रवेशद्वारमा साधनहरू राखेर उनीहरूलाई अवरोध गर्ने प्रयास भएपछि ८० जना अधिकारी र प्रहरी पैदलै राष्ट्रपति निवासभित्र छिरेका थिए । मुख्य गेटमा पुगेपछि अनुसन्धान टोलीले यूनलाई गिरफ्तार गर्ने प्रयास गर्यो । तर, पाँच घण्टा लामो तनावपछि पनि राष्ट्रपतिको सुरक्षा टोलीले अनुसन्धान टोलीलाई भवनभित्र प्रवेश गर्न दिएन ।

सुरक्षा टोलीले राष्ट्रपति निवास वरपर २०० सुरक्षा अधिकारी र सैनिकहरूको पर्खाल खडा गरेको थियो । सुरक्षा अधिकारीहरूले गेटमा प्रवेश अनुमति दिने छलफल गरे पनि ठूलो भीड र तनावपूर्ण परिस्थितिका कारण अनुसन्धान टोलीले सुरक्षाका कारण पक्राउ प्रयास स्थगित गरेको जनाएको छ । राष्ट्रपति यूनका कानूनी प्रतिनिधि यून ग्याप-क्युनले पत्रकार सम्मेलनका क्रममा अवैध पूर्जीका आधारमा राष्ट्रपतिलाई गिरफ्तार गर्नु कानूनसम्मत नभएको बताए । ‘यस सम्बन्धमा संवैधानिक अदालतमा प्रक्रिया अघि बढाइएको छ, त्यहीअनुसार हुनुपर्छ,’ उनले भने ।​

यूनसमर्थकले आक्रमण गर्न सक्ने भन्दै बिहान ५ बजेबाट प्रहरीको थप टोली खटाइएको थियो । लगभग २ हजार ७०० प्रहरी घटनास्थलमा तैनाथ गरिएको थियो । राष्ट्रपति यूनका समर्थकहरूले विरोध गरे पनि कुनै ठूलो झडप भएको छैन । दिउँसो पौने २ बजे अनुसन्धान टोलीले घटनास्थलबाट फिर्ता हुने निर्णय गर्यो । त्यसपछि यूनका समर्थकहरू खुशी भएका थिए । अनुसन्धान टोलीले पुनः अर्को निर्णय लिएर कदम चाल्ने जनाएको छ । यूनको पक्राउ पुर्जीको म्याद जनवरी ६ सम्म छ ।

अनुसन्धान कार्यालयले राष्ट्रपति यूनलाई पक्राउ गरेर सरकारी परिसर ग्वाचियोनको अनुसन्धान कार्यालयमा लैजाने योजना बनेको छ । घटनासम्बन्धी विस्तृत अनुसन्धान हुनेछ ।