काठमाडौ ।  शीर्षटोली लिभरपुलले इङ्लिस प्रिमियर लिग फुटबलमा आफ्नो अग्रता थप बलियो बनाएको छ । लिग अन्तर्गत आइतबार राति भएको खेलमा लिभरपुलले टोट्टनहामलाई उसैको मैदानमा ६–३ गोलको फराकिलो अन्तरले हरायो । लिभरपुलको जितमा लुइस डियाज र मोहम्मद सलाहले दुई दुई गोल गर्नुभयो । यस्तै एलेक्सिस म्याक एलिस्टर र डोमोनिक स्जोबोस्ज्लाइले एक एक गोल थप्नुभयो ।

टोट्टनहामका जेम्स म्याडिसन, डेजान कुलुसेभस्की र डोमोनिक सोलान्केको गोल सान्त्वना बन्यो । लिभरपुलले पहिलो र दोस्रो हाफमा समान तीन तीन गोल गरेको थियो । जितसँगै लिभरपुलले शीर्षस्थानमा चार अङ्कको अग्रता बनाएको छ । १६ खेल सकेको लिभरपुलको ३९ अङ्क छ । एक खेल बढी खेलेको चेल्सी ३५ अङ्कसहित दोस्रो स्थानमा छ । पराजित टोट्टनहाम १७ खेलबाट २३ अङ्क जोड्दै ११औँ स्थानमा छ