सल्यानमा भएको मिनीट्रक दुर्घटनामा चारजनाको मृत्यु
काठमाडौं । सल्यानमा भएको मिनीट्रक दुर्घटनामा चारजनाको मृत्यु भएको छ । दुर्घटनामा परी मृत्यु हुनेमा स्थानीय १४ वर्षका गोवर्द्धन खड्का, १२ वर्षीय डिल्ली भन्ने अनिल भण्डारी, १५ वर्षकी सिर्जना बस्नेत र घाइते चालक २६ वर्षीय मानबहादुर भण्डारीको को मृत्यु भएको जिल्ला प्रहरी कार्यालय सल्यानका प्रहरी निरक्षक रेशम खत्रीले जानकारी दिए । सल्यान कपुरकोटको सिनबाङमा सोमबार भएको ट्रक दुर्घटनामा अन्य सात जना घाइते भएका छन् ।
सल्यानको कपुरकोट गाउँपालिका(६ सिनबाङको दुबेदेबाट धान र पराल लिएर सिनबाङ जाँदै गरेको मिनीट्रक सोमबार बेलुकी करिब ६ बजेतिर दुर्घटना भएको थियो । खत्रीका अनुसार घाइते हुनेमा १३ वर्षीया खुमा बस्नेत, १३ वर्षीया सृजना बस्नेत, ३५ वर्षीया नन्दा बस्नेत, १७ वर्षीय जितसागर बस्नेत, १७ वर्षीय सञ्जीव बस्नेत, २९ वर्षीय शंकर खडका, ३५ वर्षीय देवबहादुर बस्नेत र २२ वर्षीय हिक्मत थापा रहेका छन् । प्रहरी निरीक्षक खत्रीका अनुसार दुर्घटनामा परेको मिनीट्रक सडकदेखि १ सय ५० मिटर तल खसेको थियो ।
