भक्तपुरमा टिपरको ठक्करबाट मोटरसाइकल चालकको मृत्यु
भक्तपुर । भक्तपुरमा टिपरको ठक्करबाट एक जना मोटरसाइकल चालकको मृत्यु भएको छ। मध्यपुर ठिमी नगरपालिका–४ नयाँ ठिमीस्थित सडक खण्डमा शनिबार दिउँसो १ बजेतिर काठमाडौंबाट भक्तपुरतर्फ आउँदै गरेको गण्डकी प्रदेश ७ प. ५३५३ नं. को मोटरसाइकललाई सोही दिशातर्फबाट आउँदै गरेको बागमती प्रदेश ४ ख २९०१ नं को टिपरले पछाडिबाट ठक्कर दिई दुर्घटना हुँदा मोटरसाइकल चालक जिल्ला काभ्रेपलान्चोक मण्डनदेउपुर नगरपालिका वडा नं १ घर भई हाल भक्तपुर कमलविनायक बस्ने वर्ष अन्दाजी २१ को सुवास तामाङ गम्भीर घाइते भएका थिए।
उनलाई तत्कालै उपचारको लागि मध्यपुर अस्पताल ठिमी लगिएकोमा उपचारकै क्रममा मृत्यु भएको जिल्ला प्रहरी परिसर भक्तपुरका निमित्त सूचना अधिकारी प्रहरी निरीक्षक टेकेन्द्र शर्मा पौडेलले जानकारी दिए। मोटरसाइकल पछाडि सवार जिल्ला काभ्रेपलान्चोक महाकाल गाउँपालिका वडा नं. ६ घर भई हाल भक्तपुर कमलविनायक बस्ने वर्ष २० को सञ्जीव थापामगरको मध्यपुर अस्पताल ठिमी भक्तपुरमा उपचार भइरहेको छ। दुबै सवारी साधन र टिपर चालक जिल्ला काभ्रेपालन्चोक मण्डनदेउपुर गाउँपालिका–६ बस्ने वर्ष २८ को राजकुमार राईलाई प्रहरीले नियन्त्रणमा लिएको छ।
