ताइपेइका चोकहरूमा चिनियाँ सैनिक अभ्यासलाई लिएर मिश्रित धारणा आइरहेका छन्। धेरैले आफूहरू चिन्तित नरहेको बताइरहेका छन्। तर त्यो साँचो हैन। चीनको छेउमा बस्नु भनेको भूकम्प आउने ठाउँमा बस्नु सरह हो। त्यसमा सदैव जोखिम हुन्छ तर यी अभ्यासहरू झन् झन् ठूला र खतरनाक बन्दै गएका छन्। ताइवानको सत्तारूढ डीपीपी र त्यहाँको विपक्षी दलबीच सम्बन्धमा चिसोपन छ र उनीहरूबीच संसद्‌मा पनि मतभेदहरू देखा पर्ने गरेको छ। तर चिनियाँ सैन्य अभ्यासले दुई पक्षलाई एक ठाउँमा ल्याएको छ। परम्परागत रूपमा चीन पक्षधर शक्तिका रूपमा हेर्ने गरिएको विपक्षी दल केएमटीले बेइजिङलाई संयम अपनाउन भनेको छ। अहिले यो समयमा उनीहरू पनि बेइजिङसँग मित्रवत् शक्तिका रूपमा देखिन चाहिरहेका छैनन्। यो एउटा अचम्मको विडम्बनापूर्ण अवस्था हो जसले चीनका कम्युनिस्ट नेताहरूले ताइवान र त्यहाँका मानिसहरूबारे कति कम जानकारी राख्छन् भन्ने देखाएको छ। चीनले सैनिक कारबाहीहरू पूर्ण रूपमा ‘स्वतन्त्र पक्षधर शक्तिहरूलाई कमजोर पार्न र पराजित गर्न’ लक्षित भएको बताइरहेको छ। प्रत्येक पटक चीनले सैन्य चेतावनी दिँदा डीपीपीको समर्थन वृद्धि हुने गर्छ र ‘चीनप्रति मैत्री’ भाव राख्ने केएमटीको समर्थन घट्छ। त्यसको ताजा उदाहरण ज्यानुअरीको चुनावअघिका महिनामा भएका सैन्य हस्तक्षेपहरू हुन् जसले लाईलाई सर्वोच्च पदमा निर्वाचित गराएको थियो। यदि ताइवानका नागरिकहरूलाई बेइजिङलाई चुनौती दिने दल र नेताबाट टाढै रहन धम्क्याउने उद्देश्य चिनियाँ कदमको हो भने अहिलेसम्म हेर्दा त्यसले ठ्याक्कै विपरीत प्रभाव पारेको देखिन्छ।

चीन-ताइवान सम्बन्ध