नेपाललाई हङकङले दियो ११५ रनको लक्ष्य
काठमाडौं । एसिसी प्रिमियर कप टी–२० क्रिकेट प्रतियोगिताअन्तर्गत समूहको तेस्रो खेलमा नेपाललाई जितको लागि हङकङले एक सय १५ रनको लक्ष्य दिएको छ । ओमानको अल इमिरेट्स क्रिकेट मैदानमा टस हारेर पहिले ब्याटिङको निम्तो पाएको हङकङले निर्धारित १७।५ ओभरमा सबै विकेटको क्षतिमा एक सय १४ रन बनायो । हङकङका लागि आन्सी राथले ३४ रन बनाए ।
जेसान अलीले १४, कप्तान निजकट खानले १२ र इशान खानले ११ रन बनाए । बलिङमा नेपालका अविनाश बोहराले तीन विकेट लिए । ललित राजवंशी र दीपेन्द्रसिंह ऐरीले दुई दुई तथा करण केसीले एक विकेट लिए । वर्षाले केही समय ढिला सुरु भएको खेल १८ ओभरमा झारिएको हो ।
प्रतियोगिताको समूह ‘ए’ मा रहेको नेपाल आज लगातार तेस्रो जित निकाल्दै एक खेल अगावै सेमिफाइनल पुग्ने लक्ष्यमा छ । यसअघि समूहको पहिलो खेलमा नेपालले मलेसियालाई पाँच विकेट तथा कतारलाई ३२ रनले हराएको थियो । यस्तै हङकङ पनि दोस्रो जित निकाल्ने योजनामा छ । हङकङले यसअघि कतारलाई २६ रनले पराजित गरेको थियो । हङकङ साउदी अरेबियासँग ५५ रनले पराजित भएको थियो ।
