काठमाडौं । हिरण्यवर्ण महाविहार ‘क्वाबहाः’ ललितपुरको आयोजनामा यही फागुन ३० र चैत १ गते ‘यल इतिल्हन सम्यक् महादान पर्व’ हुने भएको छ । दीपङ्कर पर्वको नामबाट चिनिने यो पर्वको सुरुआत हिरण्यवर्ण महाविहार निर्माण गरेका मल्ल राजा भाष्करदेवका सन्तति भलिभारोले गरेको मानिन्छ ।

सम्यक् पर्वको मुख्य दिन फागुन ३० गते बुधबार पाटनका १८ वटा प्रमुख बहाः, बही, चापागाउँ, बुङ्गमति, कीर्तिपुर, काठमाडौं, ललितपुर र भक्तपुरका महाविहारबाट ल्याइएका दीपङ्कर बुद्ध, आर्यतारा र अन्य देवतालाई साँझ ७ बजेदेखि पाटन दरबारक्षेत्रमा भेला गराइने छ । ज्येष्ठवर्ण महाविहार तंगःबहालबाट ल्याइएको वसुन्धरा देवीलाई यस भेलामा सामेल गराइएपछि यहाँबाट सबै देवगणलाई नागबहाल लगिनेछ ।

ती देवगणलाई सूचीअनुसार राति अबेरसम्म ठाउँ तोकेर विराजमान गराइनेछ । चैत १ गते सम्यक् महादान हुनेछ जुन बिहान ४ बजेदेखि दिउँसो १ बजेसम्म श्रद्धालु भक्तजनलाई दीपङ्कर बुद्ध र अन्य देवदेवीहरूको पूजाअर्चना र दर्शन गर्न दिइनेछ । त्यसपछि भूमिशोधन पूजा र दानका कार्यक्रम हुनेछन् । विसं.१८६१ सम्म हरेक वर्ष हुँदै आएको यो पर्व राजा रणबहादुर शाहका शासनकालदेखि हरेक चार वर्षमा हुँदै आएको छ ।