काठमाडौं ।  जिल्ला प्रहरी परिसर ललितपुरका प्रमुख सिद्धिविक्रम शाह हेडक्वार्टर तानिएका छन् । उनलाई शनिवार दिउँसो नै हेडक्वार्टर तानिएको हो । ‘उहाँलाई आजै हेडक्वार्टर तानिएको हो, साँझसम्ममा पत्र जान्छ’, प्रहरी महानिरीक्षक (आईजीपी)  वसन्तबहादुर कुँवरले भने ।​ आईजीपी कुँवरका अनुसार ललितपुर प्रहरी प्रमुखको जिम्मेवारी अहिलेसम्म अन्य कसैलाई तोकिएको छैन । प्रधानमन्त्री पुष्पकमल दाहाल ‘प्रचण्ड’, गृहमन्त्री नारायणकाजी श्रेष्ठ र सुरक्षा निकायका प्रमुखबीच शनिवार बिहान भएको छलफलपछि उनलाई जिम्मेवारीबाट हटाउने तयारी भएको हो ।