काठमाडौं । काठमाडौं चलिरहेको प्रधानमन्त्री कप महिला राष्ट्रिय क्रिकेटमा गण्डकी प्रदेशले पहिलो जित दर्ता गरेको छ । आज शुक्रबार मूलपानीमा भएको खेलमा कर्णाली प्रदेशलाई ४४ रनले हराउँदै गण्डकीले पहिलो जित दर्ता गरेको हो । जितका लागि १४२ रनको लक्ष्य पछ्याएको कर्णाली प्रदेशले २० ओभरमा ६ विकेट गुमाएर मात्र ९७ रन बनाउन सक्यो ।

कर्णालीका लागि गौरी बोहराले २६ तथा तिर्सना विश्वकर्माले १९ रन बनाइन् । गण्डकीकी रचना चौधरीले २ तथा सुमन खतिवडा र ज्योत्सना मरासिनीले समान १ विकेट लिए । यसअघि पहिला ब्याटिङ गरेको गण्डकीले ओपनर अञ्जली विश्वकर्मा र ज्योत्सनाको अर्धशतक मद्दतमा १४१ रन बनाएको थियो ।

१८ रन बनाउँदा ३ विकेट गुमाएको गण्डकीका अञ्जली र ज्योत्सनाले चौथो विकेटका लागि ८४ रनको साझेदारी गरे । अञ्जली ४८ बलमा ५१ रन बनाउँदै १६ औं ओभरमा र ज्योत्सना ४० बलमा ५० रन बनाउँदै खेल सकिन ३ बल बाँकी छँदा आउट भइन् ।

कर्णालीका यमुना थारु र अञ्जु गुरुङले समान २ विकेट लिए भने रश्मिले १ विकेट हात पारिन् । ८ टिम सहभागी प्रतियोगितामा यो कर्णालीको लगातार दोश्रो हार हो । गण्डकी भने आफ्नो पहिलो खेलमा हिजो लुम्बिनी प्रदेशसँग पराजित भएको थियो ।