पूर्वसभामुख कृष्णबहादुर महराका छोरा राहुलविरुद्ध सुन तस्करीमा मुद्दा दायर
काठमाडौं । इलेक्ट्रिक सिगरेट (भेप) मा लुकाएर गरेको सुन तस्करी प्रकरणमा नेकपा माओवादी केन्द्रका नेता कृष्णबहादुर महराका छोरा राहुल महरासहित चार जनाविरुद्ध बुधबार मुद्दा दर्ता भएको छ ।
जिल्ला सरकारी वकिल कार्यालय काठमाडौंले महरासहित, लोकेन्द्रकुमार पौडेल, बेल्जियम घर भई अहिले काठमाडौं बस्ने दावा छिरिङ र काठमाडौंका निमा गुरुङलाई प्रतिवादी बनाएको छ । प्रतिवादीमध्ये निमा फरार छन् ।
सरकारी विकल कार्यालयले उनीहरूविरुद्ध आपराधिक विश्वासघात, भन्सार चौरी पैठारी तथा सङ्गठित अपराधसम्बन्धी कसुरमा मुद्दा दर्ता गरेको हो । उनीहरूसँग आठ करोड ५५ लाख २८ हजार तीन सय ७४ रुपैयाँ बिगो माग दाबी गरिएको छ ।
२०७९ सालको पुस १० गते दुबईबाट भेपमा लुकाएर ल्याएको नौ किलो ११ ग्राम पाँच सय २४ मिलिग्राम सुन भेटिएको थियो । त्यही सुन भन्सारबाटै चोरी भएर सीआईबीले अनुसन्धान गरी गएको असार २७ मुद्दा दायर भए पनि सुन ल्याउने समूहमाथि अनुसन्धान भएको थिएन । सुन भन्सारमा रहेको बेला छुटाउन दवाब दिएको आरोप पूर्वसभामुख महराका बाबुछोरामाथि लागेको छ । यो प्रकरणमा पूर्वसभामुख महरालाई प्रहरीले बयान कागज गराएर छाडेको छ ।
