मान्सिनी साउदी अरबको मुख्य प्रशिक्षक
काठमाडौं । रोबर्टो मान्सिनी साउदी अरबको फुटबल टिमको मुख्य प्रशिक्षक नियुक्त भएका छन् । इटालीको मुख्य प्रशिक्षकबाट राजीनामा दिएको दुई हप्तामा मान्सिनीले साउदी अरबको राष्ट्रिय टिम हेर्ने टुङ्गो लागेको हो ।
५८ वर्षका प्रशिक्षकले इटालीलाई सन् २०२० को युरोकपको उपाधि जिताएका थिए । इङ्ल्याण्डलाई वेम्बलीमा पेनाल्टीमा हराउँदै इटालीले युरोकपको उपाधि उचालेको थियो ।
३७ खेलमा अपराजित रहेको विश्व कीर्तिमान कायम गरेका मान्सिनी ईटालीलाई सन् २०२२ को विश्वकपमा छनोट गराउन भने असफल भएका थिए ।
उनले साउदी अरबसँग सन् २०२७ सम्म रहने गरि सम्झौता गरेका छन् । उनले सेप्टेम्बर ८ मा पहिलो खेलको रुपमा न्युक्यासलमा कोस्टा रिकासँग खेल्ने तालिका रहेको छ ।
‘यो मेरा लागि राम्रो अवसर हो । एसियामा बढ्दो फुटबलको लोकप्रियतालाई हेरेर नयाँ देशको अनुभव लिने अवसर पनि हो ।’ मान्सिनीले भनेका छन् ।
पछिल्लो विश्वकपमा साउदी अरबले समूह चरणको खेलमा विश्व विजेता बनेको अर्जेन्टिनालाई पहिलो खेलमा २–१ ले स्तब्ध बनाएको थियो ।
मान्सिनीले सन् २०१२ मा म्यानचेस्टर सिटीलाई प्रिमियर लिगको उपाधि दिलाएका थिए । उनले फ्लोरेनटिना, लाजियो, इन्टर मिलान, गलातासारे र जेनिट सेन्ट पिटर्सवग सहितका क्लबलाई समेत नेतृत्व गरेका छन् । एजेन्सी
