काठमाडौं । केही नेपाल ऐनलाई संशोधन गर्न बनेको विधेयकलाई स्वीकृत गर्ने प्रक्रियालाई लिएर रास्वपा र राप्रपाले विरोध जनाएपछि प्रतिनिधिसभा बैठक नै स्थगित भयो । बैठक स्थगित गर्नुअघि सभामुख देवराज घिमिरे र रास्वपा सांसद्‌बीच सवालजवाफ चलेको थियो ।
केही नेपाल ऐनलाई संशोधन गर्ने विधेयकमाथि परेका विरोधका सूचना निर्णयार्थ पेश गरिसकेपछि सभामुखले मन्त्रीलाई विधेयक पेश गर्न समय दिएका थिए ।

सभामुखको निर्देशनपछि कानून मन्त्री धनराज गुरुङले विधेयक पेश गरे । बहुमतबाट विधेयश पेश गर्ने प्रस्ताव पारित भयो । त्यसपछि सभामुखले शिक्षा मन्त्री अशोक राईलाई अर्को विधेयक पेश गर्न समय दिए । मन्त्री रोष्ट्रममा पुगेपछि रास्वपा र राप्रपाका सांसदहरू उठेर विरोध जनाए । सभामुखले प्रतिनिधिसभा नियमावली पढेर सांसदलाई बस्न आग्रह गरे । रास्वपा सांसदले मानेनन् ।
केही नेपाल ऐन संशोधन गर्ने विधेयकमार्फत् राजनीतिका नाममा गम्भीर प्रकारका अपराधलाई छुट दिन लागिएको भन्दै रास्वपा सांसदहरूले विरोध जनाएका हुन् ।

‘राजनीतिका नाममा कसलाई बचाउन ल्याएको विधेयक हो ? इँटाभट्टामा ज्युँदै मान्छे पोल्ने, एम्बुलेन्स थुतेर मान्छे थुतेर मार्नेलाई बचाउन अथवा भाला रोपेर मार्नेलाई लागि ल्याएको हो ? यो विधेयक ?’ रास्वपाकी सांसद सुमना श्रेष्ठले प्रश्न गरेकी थिइन् ।
त्यसपछि राप्रपा र रास्वपा सांसदहरूले विरोध कायम राखेपछि सभामुखले रोष्ट्रममा विधेयक पेश गर्न गएका मन्त्रीलाई फिर्ता बोलाएर बैठक आइतबार साढे ४ बजे १५ मिनेटका लागि स्थगित गरे ।

यसैबीच सांसद श्रेष्ठको अभिव्यक्तिप्रति नेपाली कांग्रेसका सांसद राजेन्द्र बजगाईंले आपत्ति जनाएका छन्। सांसद श्रेष्ठले संसदीय मान्यताविपरीतको भाषा संसद्मा प्रयोग भएको भन्दै त्यसलाई रेकर्डबाट हटाउन उनले माग गरे । ‘सुमना श्रेष्ठज्यूले बहुमतको आधारमा पास गर्ने भए, गुण्डाशैलीमा पास गर्ने भए भन्ने अभिव्यक्ति दिनुभएका कारणले संसदीय मान्यताविपरितको भाषा भएको कारणले अविलम्ब डिलिट हुनुपर्छ भन्ने मेरो माग छ,’ सांसद बजगाईंले भने।